Diferente unidad a mobilisa den area di Esso Heights pa un otro caso di drive by shooting. Un acto serio cu algun tempo atras a lanta cabes cu consecuencia fatal y cu a causa consternacion den comunidad. Diaranson anochi ta bolbe registra un otro caso, caminda dos sospechoso den un Toyota Yaris blanco lo a pasa dilanti un cas y los un of mas tiro.
Den careda di 11:15 pm ta pidi presencia di polis na Esso Heights pa un caso serio di tiramento y menasa. Segun por a compronde, e tin di haber cu un pareha hoben cu a bay laga otro y un di nan no por acepta cu amor a caba.
Debi na esaki a cuminsa un confrontacion cu e bira despues un señal serio di menasa,na momento cu e pareha masculino lo a pasa los tiro den cercania di e cas di su ex-pareha. Mesora polis a mobilisa diferente unidad den e area pa asina cuminsa tira bista riba e auto cu a indica como e posibel autor di e drive by.
A para algun yaris pa controla pero ningun tabata e auto en cuestion. Lo ta trata di dos hoben den e auto y cu lo a bandona e area. Na sitio tambe a bin compronde cu e victima lo a haya yamada di e sospechoso ( su ex-pareha) y cu lo a haci algun menasa serio den su contra.
Polis a cera e area pa asina cuminsa cu e parti investigativo. No ta descarta cu den e siguiente ora/dia lo cay un of mas detencion relaciona cu e caso alarmante aki, caminda arma di candela keto bay ta hunga un rol, causando panico den comunidad.
