Esaki ta e condicion di un persona cu no kier pordona, cu no kier laga cosnan di pasado un banda ,cu no kier laga los, y cu constante ta ripiti mesun cos, pensando cu asina su curason ta wordo alivia, pero al contrario, pocopoco su amargura ta sali na cla dilanti di tur hende,y depresion lo bira su compañe.
Como mayor ta dificil pa bo dirigi bo Famia ora bo situacion ta manera esun cu nos a menciona na cuminsamento pasobra bo cas lo sufri pa motibo di bo curason amarga .
Si bo ta dirigi un organisacion of negoshi, ta igual pasobra e miembresia/ empleado lo cera conoci cu bo amargura, y cu nada no ta sali bon, pasobra tur cos di bo so mester bay dilanti y e idea y proyecto di otro no ta conta, pasobra ora un persona ta amarga semper e ta wak tur cos pa e so, y otro nan por bien lubida.
TA BOLUNTAD DI DIOS PA NOS PORDONA OTRO
Bijbel ta avisa den Testament Bieu den buki di Isalas43:18 (capitulo 43 versiculo 18) caminda Dios ta prohibi, pa nos no wak atras y no biba den pasado bisando: No recorda e cosnan di antes ni keda pensa riba cosnan cu a pasa caba.( Laga nos corda cu na salida di Sodoma y Gomorra Dios bisa pa no wak atras Genesis 19:17.(Isaias 43 :19)
Si bo kier Señor haci algo nobo pa bo, bo mester ta dispuesto pa laga cosnan bieu bay.
Pero tin hende ta mara asina tanto na pasado, cu nan no ta ripara cu esaki ta stanka nan vision personal y ta pe motibo ey nan no ta bayendo dilanti.
No uza hende como kruk di amargura.(Mateo 6:14-15)
Den Testament Nobo den e buki di Hebreonan12:14-15 (capitulo 12 versiculo 14 te cu 15) Señor ta bolbe adverti bisando: Aspira pa tin paz cu tur hende, y santificacion, sin cual ningun hende lo no mira e cara di Señor. Versiculo 15 ta bisa: Mira pa ningun hende no keda sin alcansa e gracia di Dios, pa ningun rais di amargura no spreit y causa problema y door di esaki hopi wordo contamina.
Hende grandi ta contamina na yiunan cu falta di pordon y amargura.
Ayayay Dios ta spierta nos, tin hopi famia, hopi hende ta papia di depresion, pero hopi no kier admiti cu ta falta di pordon, ta pone hende no kier laga pasado bay.
Nos ta un isla chikito, pero cu relacion cu henter mundo, y nos por a mira rond di nos den varios pais grandi con un grupo chikito yena cu odio y amargura, a contamina e poblacion y hiba paisnan cu tur recurso natural cu Dios a duna, den pobresa y decadencia extremo.
Y te ainda tin hopi wowo cera, y hopi horea cu no kier tende, cu nos no por sigui venga otro,pasobra esey no ta di Dios.
Dios libra nos di orguyo, rabia, odio, falta di pordon y amargura,pa asina nos hogar por ta bendiciona y nos lo mira bienestar den nos pais.
