Diadomingo atardi a yega un vuelo di Avianca for di Bogota, Colombia, riba cual e Capitan a activa Aeropuerto pa un pasahero cu ta duna sintoma di Coronavirus. Paramediconan a trata e pasahero mesora, cu tabatin calafriu durante e vuelo di dos ora. A resulta, despues di testnan y evaluacion, cu e sintomanan cu a presenta, tabata di un simpel griep y no Coronavirus. Consecuentemente, rumornan cu a sali despues no ta cuadra cu berdad!
Departamento di Salubridad Publico a emiti un comunicado di prensa tambe awe pa refuta e rumornan aki, specialmente unda ta bisa cu Gobierno, den forma delibera, ta tapando e noticia aki pa comunidad. DVG a sigura di ta siguiendo tur desaroyo di cerca y cu Aruba na e momento aki ta monitor tur posibel caso, mescos cu henter mundo ta haciendo.
E pashent envolvi mes, ta biba na Aruba. E tabata di vakantie na Colombia y den e proceso a bay Spaña tambe cu vakantie. Pues, e no a bay China ni ningun pais peligroso. Ta pesey e capitan tabata un poco mucho lihe pa bati alarma pa un posibel caso di Coronavirus riba su avion yegando Aruba.
Mañan mainta pa 8:30 di mainta nan lo duna un “update” riba e ultimo desaroyonan rond di Coronavirus y con Aruba ta prepara pa esaki. Keda pendiente pa e transmicion bibo via 24ora.com – Nos ta prome den noticia!
