Parlamento kier sa mas di uni scolnan S.P.O

E Fraccion di Partido AVP den Parlamento a manda un carta awe pa Presidente di Parlamento, den cual ta solicita pa yama Minister di Enseñansa, dr. Rudy Lampe, pa presenta den un reunion publico, kico ta su plannan pa uni Scol Practico pa Ofishi (SPO) di Brazil y di Santa Cruz. Docentenan na mas di un ocasion a yega di expresa di ta contra, pero ta parce cu keto bay e mandatario ta pensa diferente.

ADV

Ayera a tuma luga un reunion na cede di SIMAR na Sabana Blanco, den cual e dos sindicatonan mas grandi den enseñansa, esta SIMAR y SEPPA a uni pa e causa aki. A pidi presencia di Minister dr. Rudy Lampe, cu den e reunion no por a contesta tur e preguntanan. El a splica e docentenan presente cu e no a tuma un decision ainda pasobra e ta wardando riba resultado di e aña escolar aki. E ora lo tin un miho bista riba kendenan lo sigui pa MAVo, pa HAVO y eventualmente pa SPO. Ta ora e tin un miho bista di cuanto alumno e scolnan lo tin pa e aña escolar 2019-2020, e ora lo por tuma un decision bon balansa.

Sinembargo, Marlon Sneek, lider di Fraccion di AVP den Parlamento ta insisti cu nan lo kier un reunion publico awor pa por cera conoci cu e plannan di Gobierno riba e tema aki. E ta cuminsa na bisa si cu AVP no ta na fabor di e plannan di Minister, cu ta inclui muda Scol Paso pa Futuro pa unda awor aki Beatrixschool ta situa. AVP ta desea un reunion cu caracter di urgencia den Parlamento pa atende e union di e dos scolnan SPO y di mudamento di Scol Paso pa Futuro.

Comments

comments