Un delegacion pisa di miembronan di Parlamento di Aruba, encabesa pa mr. Ady Thijsen como Presidente, hunto cu Lider di Fraccion di MEP, Rocco Tjon y Setty Yarzagaray di Fraccion di MEP, Lider di Fraccion di AVP, Marlon Sneek y Robert Candelaria pa Fraccion di AVP y Lider di Fraccion di RED, esta Ricardo Croes, a sali den fin di siman pa Den Haag, Hulanda. Meta di e bishita relampago di 6 miembro aki ta pa topa cu Parlamentarionan Hulandes adelanta den anticipacion pa e reunionnan cu lo sigui awo den cual Corsou y Sint Maarten tambe lo ta hunto.
Pa algun tempo caba e Parlamentonan di Aruba, Corsou, St. Maarten y Hulanda ta purbando pa yega na acuerdo riba varios tema en comun. Un di nan sin duda ta e “Geschillenregeling” cu cada biaha ta dal un paso padilanti y dos paso patras. Bisando esey, e delegacionnan cada biaha ta yega asina cerca pero toch asina leu di un acuerdo. Ta parce tin biaha tambe cu Parlamento y Gobierno di Hulanda mes no ta riba e mesun liña di pensamento riba e tema specifico aki.
Pa Gobierno di Hulanda no ta mira mucho espacio pa tin igualidad entre e paisnan na momento cu tin un discusion constitucional. Den pasado specialmente Aruba a yega di tin diferencianan di opinion pisa cu Madre Patria. No obstante cu despues e mesun Raad van State di Hulanda a duna Aruba rason den e discusion, toch Gobierno di Hulanda kier keda den e posicion di liderazgo ora ta atende temanan constitucional. E miembronan di Reino Hulandes na e otro banda di ocean ta desea pa tin un instacia independiente unda por acudi ora cu entre Gobiernonan no por saca afor ken ta robes of ken tin rason.
Pa algun mr. Mike Eman a haci tur esfuerso, papiando y purbando pa convence varios politico Hulandes riba e tema aki, pero toch sin mucho resultado. Desde november 2017 mr. Evelyn Wever-Croes ta na cabes di Gobierno di Aruba y tambe a sigui cu e discusion aki. Wever conoce e materia bon for di tempo di Parlamento, unda tambe tabatin varios intento pa yega na un acuerdo, pero sin resultado. Awor aki Parlamento di Aruba mes kier purba yega na un acuerdo cu coleganan Hulandes pa hunto, esta Parlamentonan di Hulanda, Aruba, Corsou y St. Maarten presenta e mocion hunto na Gobierno di Reino Hulandes, pa no duna mucho chens pa nan desvia for di e ley nobo aki.
Pero, pa por logra tin Parlamentonan hunto cu e mesun opinion, ta necesario pa tin union y mester sincronisa pensamentonan y vision den un solo documento. Via telefon of email esey ta dura mucho largo, pa cual a opta e biaha aki pa un delegacion pisa bay Hulanda y mira cu si cara-cara por logra un acuerdo cu pa e ultimo añanan ningun otro no a logra ainda.
Mester menciona cu Fraccion di POR no ta participando den e delegacion aki pasobra Lider di Fraccion di POR, Marisol Lopez-Tromp, ta malo pa algun dia caba y no ta trahando. Alan Howell, siendo Vice Presidente di Parlamento lo mester keda Aruba pa ocupa e puesto di Presidente den ausencia di Ady Thijsen.
Mester menciona si cu den e delegacion aki, tanto Rocco Tjon, Setty Yarzagaray, Robert Candelaria y Ricardo Croes ta nobo den e discusion aki. Kisas esey mes lo por “yuda” pa trece un forma nobo y diferente pa acerca Hulanda. De facto, si nos sigui e debate manera e tabata bay, nos lo sigui haya e mesun resultado di e ultimo añanan. Pues sanger nobo kisas por conduci na un logro nobo.
Exito na e 6 Parlamentarionan na Hulanda, den un esfuerso pa defende nos bandera y no nan partido of Fraccion specifico den Parlamento. Cu Ady Thijsen na cabes, siendo un hurista y un Parlamentario di hopi aña di experencia, e logro aki no ta imposibel.
