UBER na kaminda pa Kòrsou

Djasabra 4 di Mei próksimo Kòrsou lo tuma lugá e promé konferensha ‘eCuracao Business Seminar’.  Despues di su anunsio ofishal siman pasa, por mira un atenshon grandi pa e evento aki. Un di e 5 oradornan internashonal ku mas ta halando atenshon ta Sr. Mario Vinasco (Marketing Manager Analytics) di e kompania konosí UBER (San Francisco). UBER Technologies a revolushoná mundu ku nan app di pidi Taxi. Tambe Vinaso a traha na e kompania Facebook pa hopi aña. Vinasco su presentashon lo toka e tema di kon pa outomatisá e merkadeo di bo kompania, kon pa interpretá data mihó i tambe un tiki di ‘Artificial Intelligence’ (AI) ku ta un teknologia sumamente interesante den nos mundu di awe.


Ademas di Mario Vinasco di UBER lo tin un presentashon di Sr. Ramon Ray di New York. Ray ta un oradó profeshonal i tambe un ‘Best Selling Author’ ku vários buki di kon pa haya mas éksito dor di usa Facebook. Nos tur sa awendia kon importante e ta pa hasi merkadeo via retnan sosial, pero Ray lo duna tepsnan kon pa haya mas kliente gastando ménos plaka. Ramon ta un ‘serial entrepreneur’ tambe ku a lanta y bende vários negoshi, pues e lo inspirá e públiko tambe ku su storia di éksito.


Un otro oradó internashonal ta Sr. Daan Gooning di Hulanda. Daan ta un asina yamá un genio di inovashon ku a implementá vários aplikashonnan inovativo den diferente negoshi. Un di nan ku a hala atenshon di Google ta un Proyekto di ‘Google Assistant’ ku e la diseñá pa e kompania RaboBank. Daan lo elaborá riba kon importante e uso di ‘Bos’ ta i lo bira den futuro. Ya kaba miónes di hende ta usa bos pa buska algu riba google.com i den futuro esaki lo krese pa otro aplikashonnan. Ku e Banko e la krea un aplikashon ku e kliente por hasi tur su transakshonnan por medio di usa su bos.

Finalmente Diederik Kemmerling i Ivy Lacle di The Lab lo duna un resúmen di kon Kòrsou ta hasi uso di sosial media. Pues aki e públiko lo tende e último sifranan di e uso, kon aktivo Kòrsou ta, kua ta e retnan ku mas ta wòrdu usa, pa kua grupo di persona etc. Tambe nan lo elaborá riba tendenshanan eksitoso di kompanianan ku ya kaba ta aktivo riba retnan soshal.

E seminario lo ta di 9 or di mainta te algu pasa di 1 or di mèrdia na Santa Barbara Beach Resort i lo ta un programa variá ku tópikonan interesante kombiná ku un tiki entretenimentu tambe.Karchinan ta optenibel na Bruna, Van Den Tweel Zeelandia, Mensing’s Caminada i tambe riba Internèt via www.e-curacao.net. E partnernan ku a uni pa por hasi e seminario aki posibel ta Digicel Business ku vários servisio teknológiko pa tur kompania, Cpost ku su produkto Punto Mio Business i Maduro & Curiel’s Bank (MCB) ku su Mobile Banking inovativo. E-Curacao ta un produkshon di The Lab, Infinity Media supported by BENU Pharmacy, One Media Group, Tibbaa (Reinventing Ticketing), Santa Barbara Beach & Golf Resort & Oasis Coral Estate.

Comments

comments