Lider di fraccion di Movimiento Electoral di Pueblo (MEP), Shailiny Tromp-Lee ta comparti su analisis di e aña parlamentario tra’i lomba y su expectativanan pa esun cu ta cuminsa diamars 13 di september. E ta considera cu ley di integridad, regulacion di entidadnan cu ta duna credito y ahuste di invoerrechten ta entre e leynan mas importante cu a trata entre 2021 y 2022.
Den e lunanan nos dilanti, e parlamentario a indica di lo ta enfoca den haya contesta for di gobierno di reino riba un posibel anulacion di e debe cu Pais Aruba a adkiri for di Hulanda durante pandemia, mescos cu un miho condicion di refinanciamento di otro debe existente. “Sigur e aña tras di lomba mi ta mira cu nos tabatin diferente reunion publico caminda a trata ley hopi importante pa nos pais. Tambe ta wak atras na un aña caminda a sostene hopi e maneho cu gobierno a presenta pa loke ta trata e retonan cu nos tin na recuperacion di nos pais. Como fraccion, mas bien mi ta haya cu e aña tras di lomba a bay den e luz cu parlamento toch mester, na manera critico, sigui e proceso di negociacionnan cu Hulanda,’ asina Parlamentario Tromp-Lee a declara.
