Durante un conferencia di prensa dia 1 di november 2021 prome minister Evelyn Wever-Croes a informa encuanto e frontera cu Venezuela. El a splica entre otro cu ora di habri frontera bek lo cuminsa esaki door di facilita e transporte maritimo, pa motibo cu esaki ta permiti un miho control cu e transporte aereo. E mandatario a indica cu ta mas cu dies mil Venezolano a drenta Aruba pa medio di avion y a keda sin bay bek.
Di e forma aki señora Evelyn Wever-Croes a duna di conoce cu su gabinete ta para contra ilegalidad laboral. Sin embargo luna no a sera ainda y Gabinete Wever-Croes II ta haya su mes confronta cu un caso na unda un señora a bin for di Venezuela dia 31 di december 2018, pero a dicidi di keda biba y traha na Aruba. Dia 15 di oktober 2019 e persona aki a entrega un peticion pa prome permiso. E caso aki ta involucra e primo di nos prome-minister, cu ta minister di Integracion y Labor, Glenbert Croes.
Esaki pa motibo cu aparentemente e mama di minister Glenbert Croes a declara riba e formulario di DIMAS cu e ta e dunado di trabao di e señora Venezolana. Tambe e dos rumannan di minister Glenbert Croes, un cu ta su chief of staff y e otro su consehero legal, a keda involucra den e caso pa motibo cu e mama a yena nan e email-adres como adres di contacto riba e formulario di DIMAS. Na 2019 señor Glenbert Croes, como minister di Labor, ya caba tabata tin cierto influencia riba permiso di trabao cu ta acopla na permiso di estadia, pero e decision final tabata den man di minister di Integracion, Andin Bikker. Ta dificil pa kere cu minister Glenbert no lo a pidi su colega minister Andin Bikker pa fix e permiso aki pa su mama.
Aparentemente minister Andin Bikker a nenga esaki. En todo caso DIMAS a nenga e permiso dia 1 di juni 2020, locual tambe ta nifica cu DIMAS no a cumpli cu e termino legal cu Lar ta stipula pa tuma un decision administrativo. Si e mama lo a pidi e permiso awor cu Glenbert tambe ta minister di Integracion, Glenbert lo tabata den un posicion cu sigur e lo por a fix e permiso aki pa yuda su mama y complace su rumannan/chief of staff/consehero legal. Locual ta mas erg ta cu e personan cu ta asesora minister Glenbert Croes y cu mester duna man y pia na combatimento di ilegalidad laboral, manera Gabinete Wever-Croes II a anuncia cuminsamento di luna, aparentemente ta complice den un situacion cu ta bay contra di e vision di e Gabinete. Den e cuadro aki ta importante pa mustra riba e responsabilidad individual y colectivo di tanto minister-president Evelyn Wever-Croes como minister Glenbert Croes.
Ademas bon gobernacion ta rekeri transparencia. Sin embargo minister-president Evelyn Wever-Croes kier invoca eroneamente e derecho di privacidad pa evita di duna claridad riba comportacion di minister Glenbert y su staff. ‘Don’t go there’, e prome-minister ta sclama pa evita di responsabilisa pa un falta di integridad. ‘Don’t go there’, pa nos no ripara cu conflicto di interes no ta un problema di su otro primo/colega minister Endy Croes so. Don’t go there, pasobra no mester di ningun Andin Bikker mas y awo Croes (Cual?) por bisa: it’s just me, myself and I. Solo ride until I die.
