Den conferencia di prensa semanal di Fraccion di MEP den Parlamento, Parlamentario Setty Christiaans-Yarzagaray a duna di conoce cu nan ta studiando e documentonan di Presupuesto 2018 un paar di dia caba desde esaki a yega Parlamento un poco mas cu un siman pasa.
“Nos ta tumando esaki hopi na serio purbando pa saca afo preguntanan cu ta alcaso y cu ta preocupa nos di cosnan cu a pasa of cu ta poni pa pasa. Nos ta critico y ta haciendo nos trabou cu tur seriedad”.
Parlamentario Chrisitaans-Yarzagary a duna di conoce cu parti di nan trabou ta pa aclaria ponencianan cu oposicion ta trece dilanti unda nan ta duna informacion ironeo. Esaki pa informa pueblo debidamente y reitera mentiranan y informacionnan robes cu AVP ta duna pueblo. Entre otro:
- No tin acuerdo nobo cu CAFT.
E Parlamentario ta enfatisa cu esaki no ta e caso manera oposicion ta trece dilanti.
Tin mesun acuerdo cu CFT. No a pasa den Parlamento niun ley ademas di e ley di LAFT cu parlamento di AVP a aporba. Realisticamente no por cumpli cu e norma stipula mirando e deficit laga atras pa e gobierno di AVP.
- Crisisheffing conhunto cu e herstelplan no ta bay hisa e debe.
Cifranan irealistico y ficticio a conduci cu awe Aruba tin mas debe sin conta cu gobierno di AVP no a logra crecemento economico manera nan a proyecta den e ultimo añanan, alcontrario, a logra cu awe Aruba ta den recesion. Hasta duda tin awor si enberdad nan cumpli cu normanan stipula anterior na 2018 segun ley di LAFT.
Crisisheffing lo no a socede si e Gobierno di AVP a entrega cifranan real y tawata sincero cu pueblo y cu nan mes.
Parlamentario Christiaans-Yarzagaray ta sigui bisa cu e debe di nos pais tawata tey caba ora gobierno di MEP a drenta na november ultimo. Den apenas 4 luna e Gobierno di Coalicion no por a contribui na hisa e debe nacional, si no mas bien a hereda esaki. Te ainda gran parti di nan 150 dianan den gobierno a yega na un plan con pa senea situacion financiero di Aruba, trece un miho balansa entre sanea finansas y crecemento economico y atende cu e crisis social cu Aruba ta pasando aden.
Christiaans-Yarzagaray ta bisa cu sr. Arends ta lubida cu parti di e problemanan cu tin awe ta hustamente inclui companianan manera esun di dje, esta Horizon Consultancy, momento cu el a stop di traha como consehero y bay over na su compania pa cobra sumanan grandi (mas di 440 mil florin) entre aña 2014 pa 2016. E Parlamentario ta bisa cu sr. Arends mester ta menos di papia di debe y finansas publico siendo e mes a contribui na e problema cu tin awe den finansas publico cu tipo di actonan asina.
- Aumento di prijs di gasolin no un medida.
Oposicion ta bisa aumento di accijns ta un medida. Tur hende por bay riba un website y busca kico ta e prijs di gasolin riba mercado internacional y por ripara cu psijs di gasolin ta subiendo.
Durante gobernacion di AVP, hopi suerte pa nan, prijs di gasolin tawata bahando drastico y nan a dicidi di hedge e tempo ey na unda nan a freeze prijs di gasolin na un prijs halto causando cu pueblo no por a gosa di rebaho di prijs di coriente ni awa. AVP horta for di pueblo e posibilidad di gosa di nan fare share di e rebaho aki relata na prijs di awa y coriente. Anto awe net nan kier bin bisa cu ta pone un otro medida pa pueblo? E Parlamentario ta conseha AVP pa stop di insulta e inteligencia di pueblo pasobra tur hende awendia por tin acceso na tur informacion.
- Segun un ex mininster di economia y finansas cu awe ta den oposicon, gobierno ta bay saca dividendnan di companianan estatal y asina mishi cu nan assets.
Segun e Parlamentario, assest di un compania no tin nada di haber cu e parti di dividend. Prome Minister a manda un carta enberdad na tur compania estatal pa puntra e posibilidad cuanto e compania tin na su disposicion pa saca na dividend sin cu esaki ta afecta e companianan su operacion of posibilidadnan of plan di inversion. No manera gobierno di AVP cu a impone riba companianan estatal tempo nan tawata den gobierno.
A keda na cada compania estatal pa indica cuanto dividend por saca logicamente teniendo na cuenta nan plan di inversion y a base di esaki nan a duna contesta na Prome Minister nan posibilidadnan. Hasta a comprende cu si entregando dividend ta bay a costo cu no por baha prijs di awa y coriente, cu esaki no tawata un opcion pa Prome Minister.
Parlamentario Christiaans-Yarzagaray a duna di conoce cu Parlamentarionan di Fraccion di MEP ta sigui studia e documentonan di Presupuesto 2018 den e dianan cu ta bin pa tratamento den Parlamento. Alabes kier a urgi pueblo cu si tin cualkier pregunta of mester cualkier informacion, pa aserca nos libremente cu pregunta of pa informacion, cu esaki ta parti di nos trabou den Parlamento.