Cu un programa yena di actividadnan, oportunidad pa networking y conocemento profesional, e conferencia Primero Yo, organisa pa Piso 3, a reuni un cantidad di emprendedornan y profesionalnan cu a participa den un mainta dedica na desaroyo personal y empresarial.
E evento, cu ta wordo organisa pa di dos aña consecutivo, a ofrece un plataforma pa comparti conocemento, adkiri strategia nobo y intercambia experiencia tocante e diferente aspectonan cu ta contribui na crecemento di un negoshi.
QueenAnn Bergen, co-fundado di Piso 3 y un di e organisadonan, a expresa su satisfaccion cu e participacion y e ambiente positivo cu a caracterisa e conferencia. Desde trempan mainta, e actividadnan a cuminsa cu un sala yen di participante, mientras cu e diferente boothnan tabata ofreciendo servicio y experiencia na e bishitantenan.
Entre e atraccionnan tabatin un espacio pa saca potret profesional, cu e intencion di yuda participante mehora nan presencia riba plataforma profesional manera LinkedIn, como tambe Facebook. Ademas, participante por a disfruta di servicio di makiyahe di L’Oréal y e presencia di diferente partner, entre otro Aruba Bank y Notico.
Segun Bergen, e combinacion di musica, koffie, presentacionnan y actividadnan interactivo a contribui na un ambiente dinamico, unda participante no solamente tabata disfrutando di e experiencia, sino tambe tabata presta atencion na e consehonan y strategianan comparti pa e oradornan.
Di salud mental pa desaroyo empresarial
Bergen a splica cu e edicion di e aña aki ta e di dos edicion di Primero Yo. E prome edicion, cu a tuma luga aña pasa, tabata enfoca principalmente riba salud mental y amor propio, cu un ambiente mas trankil y un programa dirigi riba bienestar personal.
Pa e edicion actual, Piso 3 a dicidi di amplia e enfoke y pone enfasis riba negoshi, desaroyo profesional y crecemento empresarial. Esaki a trece un concepto nobo, cu mas actividadnan interactivo y oportunidad pa participante fortalece nan imagen profesional.
Bergen a indica cu e organisadonan tin e intencion di sigui organisa e conferencia anualmente, mirando e importancia di crea espacio unda hende por sigui desaroya nan conocemento y comparti experiencia.
Inverti den conocemento ta clave pa crece
Entre e participante tabata Duneisy Blanco, kende a participa pa prome biaha den un evento empresarial di e tipo aki na Aruba. E a considera e conferencia como un oportunidad importante pa topa otro emprendedornan y amplia su conocemento den tereno di benta, strategia y desaroyo empresarial.
Den su mensahe pa otro empresario y emprendedornan, Blanco a pone enfasis riba e importancia di sigui inverti den conocemento. Segun dje, den un mundo unda tecnologia y diferente aspecto di bida empresarial ta cambia constantemente, ta esencial pa mantene bo mes actualisa.
E inversion den conocemento no solamente ta beneficia e empresario personalmente, sino tambe ta yuda pa mehora e manera con e ta dirigi su ekipo di trabou y desaroya su empresa.
Aprendisahe pa fortalece e negoshi
Di su banda, Karen Sotomayor tambe a expresa su satisfaccion cu e contenido di e conferencia. Segun dje, e evento ta ofrece un oportunidad importante pa emprendedornan siña con pa delega responsabilidad, cuida nan negoshi y fortalece e relacion cu nan clientenan.
Sotomayor a destaca cu e diferente consehonan y strategianan comparti durante e seminario ta ofrece cierto hermentnan cu participante por aplica directamente den nan trabou diario y den maneho di nan empresa.
Cu e participacion di emprendedornan, profesionalnan y diferente partner empresarial, Primero Yo ta sigui crea un espacio pa intercambio di conocemento y desaroyo. E conferencia ta pone enfasis riba un elemento fundamental pa cualkier negoshi: e necesidad di sigui siña, adapta y inverti den bo mes pa por crece y lidera cu mas siguridad.
