Presidente di Comision Permanente di Husticia di Parlamento di Aruba y parlamentario di AVP, John Hart, ta informa cu dialuna mainta, 9 di november 2026, un reunion publico lo tuma luga den Parlamento cu Ministro di Husticia y su ekipo. E reunion lo trata diferente topico actual den e
cadena hudicial, cu atencion pa capacidad operacional, disponibilidad di recurso y e accionnan cu gobierno ta tumando pa atende e retonan existente.
Hart, conhuntamente cu su coleganan di fraccion AVP, a solicita e reunion pa parlamento por eherce su funcion di control y ricibi claridad tocante e medidanan pa fortalece Cuerpo Policial Aruba (KPA). Esaki ta inclui e disponibilidad di recurso humano, financiero y tecnico necesario pa e cuerpo por atende debidamente cu e demanda di su trabou.
“Nos mester sa cua accion concreto ta wordo tuma, cua recurso ta disponibel y con e medidanan aki lo contribui na un servicio mas efectivo. E retonan den cadena hudicial ta merece un debate serio, informacion completo y accion concreto,” Hart a expresa.
Atencion pa delincuencia hubenil
E parlamentario a recorda cu e retonan den cadena hudicial a wordo treci dilanti na diferente ocasion den Parlamento. Den e contexto aki, el a lamenta cu, segun su relato, fraccionnan di MEP y PPA a obstaculisa un vragenuur tocante delincuencia hubenil, pasobra nan kier a duna prioridad na e asunto di e reunion relaciona cu un jet priva.
Pa Hart, delincuencia hubenil ta un tema cu ta merece atencion parlamentario y un intercambio serio cu e minister responsabel. E ta enfatisa cu parlamento mester tin espacio pa trata e preocupacionnan cu ta afecta siguridad y bienestar di comunidad, y pa evalua e respuesta di gobierno.
Fortalece capacidad y reduci burocracia
Hart a señala cu e cadena hudicial ta enfrenta retonan tanto den personal como den recurso material. P’esey, e ta considera necesario pa reduci burocracia, amplia capacidad y fortalece liderazgo, cu e meta di resolve problema y mehora e coordinacion entre e instancianan envolvi.
“Nos responsabilidad ta pa contribui na un cadena hudicial cu por actua, preveni criminalidad y responde na e necesidadnan di comunidad. Transparencia y dunamento di cuenta ta esencial pa mantene y fortalece confiansa den nos institucionnan democratico,” Hart a subraya.
Cu e reunion solicita, Hart y su coleganan di fraccion AVP kier obtene e informacion necesario pa evalua e paso cu ta wordo tuma y sigui duna e retonan den husticia e atencion parlamentario cu nan merece.
