Ayera nochi pa 10:50pm a sosode un accidente pisa entre dos auto riba e brug nobo na Pos Chikito, yama “Brug Fredis Refunjol”. Investigacion preliminar, despues di scucha varios testigo na e sitio di accidente, ta mustra den direccion di velocidad halto combina cu pasamento di auto. Ta sospecha cu e auto color preto tabata pasando auto y no a regula e distancia bon ora el a drenta bek den e fila bayendo direccion Oranjestad.
Consecuentemente, e auto color preto a dal patras di e auto color cora, cu un famia completo den dje. E auto dilanti a perde control, dal dene vangrail den banda, y bay bolter te yega lama abou. E auto preto tambe a perde control y tambe a pasa dor di e vangrail pero a baha e caminda di santo eytras. E auto color cora a sufri hopi mas daño, tambe pasobra Brandweer mester a corta e auto pa por a saca un señora cu a keda pega den e vehiculo.
Departamento di trafico di Polis tin e investigacion den nan man awo y lo mester tuma un decision ken ta fout, pa seguro por paga pa e daño. Den e caso aki e gastonan ta cuantioso pasobra mester paga pa e daño na ambos auto y riba dje ta bin e gastonan medico. Tene cuenta cu ta 5 victima tabatin den e desgracia aki. E prome informa ta bisa cu ningun di e heridonan no ta di gravedad.
Awe mainta a nota cu mesora e compania encarga cu mantencion di Green Corridor a cuminsa traha riba e vangrail. E caminda direccion Oranjestad tabata cera pa trabounan por sosode cu e siguridad necesario. Pa awe mes ta drecha e daño na e vangrail y habri e caminda bek pa publico.
Contrario na antes, e compania encarga cu Green Corridor mester percura pa e caretera ta accesibel 24 ora pa dia. Pa cada rato cu e caminda ta cera, Gobierno no ta paga huur, pa cual probablemente e compania lo cobra seguro tambe pa e multa aki y pa e trabounan di reconstruccion.
