Grupo di Baile Folklorico Takiri Peru Aruba ta bay representa Peru na Corsou y nan ta contento y emociona pa por participa pa prome biaha for di Aruba. Diadomingo awo, e grupo ta invita un y tur pa bin na nan actividad cual ta un Pollada Peruana, cual ta un cuminda tipico Peruano. Esaki lo tuma luga den Timonstraat 8, for di 12’or di merdia te cu 10’or di anochi.
E Pollada ta consisti di galiña sasona cu ingredientenan Peruano, batata, aros, salada y tambe nan lo tin e bebidanan tipico cu ta Chicha Morada y tambe Inca Cola, entre otro.
A funda Grupo de Baile Folklórico Takiri Perú Aruba riba dia 12 di october 2014 na Aruba. Nan ta consisti di un grupo di hoben entusiasta cu stima e folklore y e cultura Peruano.
E idea di e bendemento di cuminda aki ta pa recauda fondo, ya cu nan ta un grupo cu no ta conta cu ningun tipo di financiamento, y ta nan mes ta financia nan biahe y nan presentacionnan. Esaki ta e motibo pakico a haci un invitacion pa bin diadomingo awo, dia 20 di october na e Gran Pollada aki. Un y tur ta bon bini.
Kendenan ta Takiri
Takiri den e idioma Quechua di Peru ta nifiga: “Esun cu ta crea musica y danza.” Nan meta: E ta un grupo di baile sin fin di lucro dedica di curason pa difundi, uni y fomenta e diversidad di danzanan folklorico Peruano.
E grupo di baile tabata tin e agrado y e honor di por participa, representando Peru den eventonan manera desfile di Dia di Himno y Bandera, cumbre di Aruba 2018, carnaval na Aruba, eventonan multicultural, procesion di e señora de los Milagros y yudando tambe den proyectonan escolar manera spreekbeurt y apoyando den eventonan benefico manera boluntario, loke ta yena nan di alegria.
