Jair Tromp ta un di e tantisimo ciudadanonan cu a bin ta kehando riba un falta di comunicacion di departamentonan di gobierno, specialmente e Departamento di Asuntonan Social. E ta señala den su declaracion cu, e unico reaccion ricibi for di e Minister encarga ta “nos ta riba dje of mi ta bay follow up pa bo.” Su situacion ta birando desesperante, pasobra e tin gastonan pa cumpli cu nan y awo su tata tambe a perde trabou.
Jair Tromp den un declaracion pa 24ora ta conta completo riba e caminda di cruz cu como Arubiano e mester cana pa haya bijstand. “Mi no ta bini na remarca pa FASE, pa motibo cu m’a perde trabou basta prome cu COVID-19. For di dia 29 di april mi a pidi bijstand y ta bayendo pa 5 luna sin haya nada.
Nan a nenga mi bjstand. Dia 25 di juni mi a haya un carta na cas informando mi cu a rechasa mi peticion pa e motibo cu mi no ta cabes di cas y mi no tin pareha/yiu. Mi tin 30 aña y ta logico cu ta ami mes mester paga mi gastonan y den e pandemia aki ken ta bay paga gasto di otro hende, cu e placa no ta ni yega pa hende paga bo mesun gastonan.”
El a sigui splica cu desde april 2020 te februari 2021 ta 10 luna cu e ta warda. Dos minister, incluyendo minister Glenbert Croes, su ruman muhe Gisette su, secretaria di e mandatario Elena y hasta cierto coordinado di Minister President a mand’e di cashi pa muraya. El a bin ta pasando den un calvario, tur dia ta yama pa puntra con a para cu su caso/peticion. Minister Glenbert tabata keda bis’e for di april e mesun frase: “Nos ta bezig cu bo caso/Ta bay follow up. Diabierna 18 di september mi a bolbe ricibi whatsapp cu e mesun contesta “Nan ta bezig cu bo caso.”
Gisette, e ruman muhe di minister Croes, a yam’e pa duna su palabra cu e lo haya bijstand dentro di un luna. E yamada ricibi aki tabata den luna di juli 2020 y e un luna ey a pasa caba. Te cu e fecha di awe, Tromp no a ricibi ningun yamada mas for di dje. Despues cu e fecha di un luna a pasa, segun Tromp, e mes a dicidi di yam’e dia 25 dia augustus. E contesta ricibi di Gisette ta cu su caso ta uno dificil y esey tabata e ultimo biaha cu el a tende algo. Desde e dia ey nan ta ignora tanto su yamada como mensahenan.
Esaki ta algo no profesional pa un hende cu posicion, e forma con e ta traha hende asina y specialmente den e pandemia aki. Henter personal di minister Croes ta priminti yudansa ta bay yega, pero nunca esaki ta yega. Incluso e secretaria a bis’e cu e mes a nenga un bijstand na momento cu nan a ofrec’e aña pasa. “Esey no ta berda. Tanto e secretaria como Gisette ta gaña,” el a bisa rabia. “Departamento di Asuntonan Social mes a bisa mi cu mi no ta haya bijstand, pasobra mi no ta cabes di cas ni tin famia. Mi a hasta ricibi un carta cu mi no ta haya bijstand p’e motibonan menciona.”
Tanto Glenbert como Gisette y e secretaria di e mandatario no ta worry cu e pueblo. Pasobra nan si tin salario halto caba, kiermen ta laga cierto hende den sufrimento y un par so nan ta yuda.