Tur aña, riba dia 1 di September, dia di prensa, e conocido fotografo y reportero Leo Vrolijk ta tene su exposicion yama E Lens di mi Wowo, bao di patrocinio di RBC Bank. El a splica cu e prome aña e no a dedik’e na ningun hende.
E tabata un exposicion grandi si, unda cu el a sinti su mes como un celebridad na Hollywood na dado momento. Den transcurso di añanan el a dedica e exposicion na varios fotografo cu a traha den pasado of cu ainda ta traha. El a dedik’e na Djispie, Janchi Tromp,kende ya a bay laga nos. Na Toko Winklaar, hasta e fotografonan di Gobierno. E tradicion a keda cu ta keda dedica na fotografonan.
E idea aki a bin, tempo cu el a cuminsa na edad di 17 aña sacando potret, el a ripara cu e tabata participa den exponan di Aruba Press Club, despues cu a bira APAR, unda cu el a participa. Despues a bin un bashi di 20 aña cu no tabata tin expo mas. Vrolijk a cana cu e idea aki con e ta bin cu un expo y pa haya tur hende participa. E tabata cana cu e idea aki pa dos aña largo, mirando cu e fondonan tabata dificil pa yega na dje. Un cos asina toch ta costa, vooral si tin cu print potret grandi. Cierto momento e tabata na Amigoe di Aruba, un colega di dje a bis’e cu RBC ta buscando algo pa sponsor en conexion di dia di prensa. Na momento cu Leo a hiba e idea, e resto ta historia. Esaki ta un exposicion cu por a mira hopi potret.
Loke e por bisa cu tempo cu nan a cuminsa 11 aña pasa, compara cu awor aki, e potretnan a drecha un mundo. Esey ta den potret di accion, composicion di shots, miho calidad, tene cuenta con bo ta saca potret y esey ta yuda e fotografonan bin dilanti.
Pa otro aña e tin algun idea y ta spera cu e por realisa nan. E intencion ta cu e kier bin cu un dark room cu pa durante expo hende por drenta. Tambe na cuminsamento di aña e kier bin cu algun charla, bin cu algun hende cu por duna informacion riba composicion di shots, con ta file potretnan digital y tambe duna charla riba e ultimo informacionnan riba fotografia digital.
Pa lanta un club, Leo a comenta cu e no sa si nos aki na Aruba ta prepara ainda. E aña aki a purba, registra e hendenan cu ta participa, pero e no a bay 100%. A haya algun si. E tin un grupo di cual su yiu muhe Lisa tambe ta aden. E ta esun cu a prepara tur e potretnan pa print. E tin entre otro Maritza Maduro cu tambe a yuda. A scoge algun hende mas pa bin cu un comision, di modo cu ta cuminsa registra y door cu nan ta registra por bin cu curso cu por upgrade fotografia mucho mas miho.
Leo Vrolijk kier a gradici RBC cu ta confia den su proyecto, cu ta para 100% tras di e proyecto aki. E ta spera cu tur su coleganan di fotografia, sigui participa, pasobra Leo ta haci’e pa nan.
