Tin un supuesto guera ta tumando luga pa loke ta stacionamento di auto di parlamentario. Ta conoci si cu tin varios luga asigna p’asina e parlamentarionan por tin e facilidad pa yega nan pia di trabao mas lihe. Pero segun Miguel Mansur, lider di fraccion di Accion 21 den un entrevista den noticiero Enfoke di diahuebs, tin algun parlamentario cu simplemente no ta ‘get the point’ y ta para su auto n’e espacio di presidente di parlamento. Hasta a bin un discusion entre e parlamentarionan, despues cu Mansur a hala atencion di un di nan. Tin manera un guera pa loke ta paramento di auto.
Presidente di Parlamento, mr. Edgard Vrolijk a comenta cu tur hende ta busca pa ataca. Si e laga un hende para na su luga un rato pasobra no tin luga, ta bira fin di mundo. Pero naturalmente tin cu corda cu tin mas trabao pa haci cu ‘parkeerwachter’. Un parlamentario no ta un parkeerwachter. Tin trabao di haci. Hopi di nan no sa kico pa haci.
En bes di prepara nan mes, lesa y mira kico t’e proceduranan, nan ta dedica na mira kico mester haci of sinta den stoel di presidente.
Na final di dia, mester bira mas serio den e trabao y laga esey pa por actua cu ne. A trece dilanti cu probablemente pa otro siman lo bin mas borchi. Ta pidi prensa den e proceso pa conscientisa pueblo cu e espacio ta parkeerplaats pa parlamentario. Asina ey e problema ey ta tra’i lomba.
Vrolijk a indica cu asina ey e por para trankil eynan. E ta lamenta si cu tin parlamentario cu kier hunga politica barata, bisando cu a corta onderstand pa dun’e un auto nobo. Vroiljk a bin haya un auto di parlamento y esey e ta uzando como presidente.
Cu tipo di reaccion asina, no ta consciente ki daño por haci na un hende. Na Corsou mes por mira, cuanto minister ta bao menasa. Nan no ta midi nan acto, djis pa hunga politica barata. Mester keda mas neutral posibel, haci e trabao manera debe ser. E reunion riba su mes a cana bon, respetando tur hende y a caba mas trempan. Algun proceso a pega un tiki, sinembargo e na final di dia e reunion a caba bon.
Lider di fraccion di Accion 21, Miguel Mansur, a splica cu e presidente di parlamento y algun parlamentario tabatin cuater aña den parlamento y den cuater aña no por a resolve cuater luga di parkeer otro banda di caminda.
Esey ta mustra hopi malo pa futuro di nos pais. Ta spera cu awo cu e presupuesto di DOW pasa cu si nan por pone un borchi cu tur hende por tin un luga di parkeer y cu e mentalidad cu pasobra bo partido cu ta den gobierno, ta kere cu ta doño di Aruba cu lo caba. Esaki ta e mentalidad cu ta hiba n’e fenomeno di ‘Friends and family’.
