Den cuadro di e reunion publico di parlamento cu a tuma luga diahuebs pa trata e presupuesto di DOW, presidente di parlamento, esta Edgard Vrolijk, a bisa cu en realidad a trata un presupuesto cu ya tabata ‘uitgeput’ pero pa formalidad mester a termina esaki completamente. El a bisa cu esaki a bay den un manera netjes y relativamente lihe y na final a aproba esaki unanimamente den parlamento.
A trece dilanti tambe cu el a vota contra di algun mocion ya cu esaki tabatin cierto aspecto cu den su concepto no tabata cuadra. “E momento ey unda cu bo kier sinta den maneho di gobierno ta un tiki fastioso, parlamento ta keda parlamento”.
A subraya si cu fraccion di MEP ta respeta cada ken su votacion. Pa loke ta trata su rol como presidente di parlamento, Vrolijk ta di opinion cu e ta haci esaki mas miho posibel y si ta pone ordo y regla, esey e parlamentarionan tin cu biba cu ne.
Por ultimo, Vrolijk a bisa cu dialuna proximo e lo presenta e ley di screening, cu e mes a traha, lo e duna un relato completo di esaki como tambe di kico tur el a bin haci como presidente di parlamento.
