Recientemente tin hopi discusion atrobe rond e tema di desaroyo hotelero riba nos isla, sin laga afo e protestanan pa stop di construi mas hotel y tur e otro factornan cu tin rond di e tema aki di desaroyo hotelero y turismo. Otmar Oduber, ex-minister di infrastructura a presenta diamars mainta durante un conferencia di prensa un documento bieu di DIP cu ta mustra kico tabata e situacion cu el a hereda e tempo ey como minister na final di 2017.
Ta papia di 6,170 camber di hotel cu diferente gobiernonan a otorga prome cu final di 2017 y Gabinete Wever Croes I. “Y mi persona a cuminsa un proceso di reuni cu tur esunnan riba e lista – a negosha cu cada un di nan pa por a logra den menos di 1 aña reduci e lista di cambernan cu tabata comprometi. Imagina bo si nos mester a traha tur e cambernan aki na Aruba, nos a reduci esaki na menos di 2500 camber.”
Oduber ta bisa cu esaki ainda ta hopi, pero tabata tin e derechonan, varios tabata erfpacht cu a pasa notario, tabata tin hende cu derecho legal riba nan.
Ta yega un punto cu bo por negosha pero despues di esey e por bira un daño di perhucio pa pais Aruba cu bo tin cu paga hopi placa, y naturalmente mester mira e bienestar den nos comunidad. “Den dje tabata tin naturalmente menos cu 2500 cambernan aki, a inclui e unico proyecto cu a bin adicional – Secrets na San Nicolas – pasobra mi persona semper a boga pa bin un hotel den e area aki y duna oportunidad na San Nicolas,” Oduber ta comenta.
Lesa mas den TREMPAN.
