Parlamentario Otami Thomasia di fraccion AVP a expresa su satisfaccion cu e trabounan di asfaltamento cu ta tuma luga den cercania di Baby Beach y Colony. Segun Thomasia, e habitantenan di e zona a spera alrededor di 30 aña pa mira un mehoracion importante di e caminda aki.
Thomasia a indica cu e proyecto ta inclui asfaltamento di aproximadamente 3,9 kilometer, for di e “I Love You” sign na Baby Beach te na e bushalte bieu di Colony.
“Esaki ta un bon comienso,” e parlamentaria a declara. Alabes, el a splica cu ainda tin otro pasonan necesario pa completa e mehoracion di infrastructura den e zona. Otro proyectonan ta den pipeline y lo sigui despues, pa finalmente Colony y e area di San Nicolas haya e atencion cu nan ta merece.
Segun Thomasia, e trabounan ta parti di un compromiso cu AVP a haci cu e comunidad. El a agrega cu durante su trabou parlamentario el a sigui papia tocante e necesidad pa Gobierno inverti mas den e parti zuid di Aruba.
E parlamentario a enfatisa cu San Nicolas tambe mester haya su turno, respet y un parti hustifica di e inversionnan publico.
“Mientras tin inversion den otro partinan di Aruba, mester mantene un balans y inverti tambe den e parti zuid”, Thomasia a expresa.
Pa e parlamentaria di AVP, asfaltamento di e caminda na Baby Beach y Colony ta un paso importante, pero tambe un señal cu despues di hopi aña di espera, comunidad di San Nicolas por cuminsa mira cambionan concreto den su infrastructura.
Parlamentario di AVP, Stephany Sevinger, a expresa satisfaccion cu e proyecto. Segun e parlamentario, e anuncio cu Minister di Turismo mr. Wendrick Cicilia y Minister di Infrastructura drs. Rene Herde a haci ta un paso importante pa drecha e accesibilidad y condicion di e camindanan den e area.
Gobierno a anuncia inicio di un proyecto nobo pa asfalta e caminda den direccion di Baby Beach, den Sero Colorado. Ta trata di un ruta cu diariamente ta conoce hopi trafico, tanto di habitantenan di e area como di bishitantenan cu ta bay e parti zuid di Aruba.
E proyecto ta forma parti di e inversionnan destina pa sigui desaroya y mehora e producto turistico den Sero Colorado y rond di Baby Beach.
Parlamentaria Sevinger a enfatisa cu e aspecto mas importante ta cu fondo genera door di turismo ta bay bek den comunidadnan di Aruba. Segun e parlamentario, esaki ta precisamente e direccion cu inversion turistico mester sigui: no solamente inverti den promocion di Aruba, sino tambe den infrastructura cu habitantenan ta uza diariamente.
E asfaltamento ta representa un “jumpstart” pa mas trabou den e area. E meta ta crea un efecto di cadena, den cual desaroyo turistico ta trece mehoracion concreto pa e comunidad y ta contribui na un miho calidad di bida.
Cu inicio di e proyecto, e comunidad di Sero Colorado por mira un resultado directo di inversion den turismo. Alabes, un caminda den miho condicion lo ofrece mas siguridad y comodidad pa tur hende cu ta transita den direccion di Baby Beach.
