Ultimo simannan constantemente tin problema di molester riba waf di carga na Barcadera. Tur wowo ta riba e huma di WEB, pero parce cu tin mas factor cu ta stroba e operacion normal na e terminal di waf di carga. Trahadonan riba waf ta señala molester di stof pisa ultimamente, despues cu Gobierno a permiti pa un compania di beton, cu doñonan procedente for di Venezuela, pa start nan operacion na Barcadera cerca di waf. Aunke e area ta destina pa industria, ta obvio cu e trabou di esun ta strobando e otronan.
Caribbean Beton ta un di e companianan cu tabata den e negoshi di coba buraco na Sero Cristal pa procesa santo, piedra y graniet. Dado momento Gobierno a stop nan operacion, precisamente pasobra nan no tabata dispone di un permiso di molester (hindervergunning). Ta bon pa menciona cu nan, ni ningun otro tabata dispone di dicho permiso pa cual Gobierno, por medio di Minister Otmar Oduber, a laga para tur y prohibi nan di sigui coba. Casnan den vecindario directo di Sero Cristal tabata keha di masha hopi molester di stof y casi no por biba normal mas.
Tin dos aspecto ta hunga un rol den e asunto aki, esta e permiso pa molester, pasobra lo stroba e biba normal di habitantenan den e area y e permiso pa por coba riba e tereno. Aunke mayoria di e terenonan ta tipo propiedad (eigendom), toch Gobierno por prohibi explotacion di e tereno si e ta parece riba e lista traha dor di Gobierno unda ta señala areanan berde (Groen gebied). Esey a haci cu varios tereno prominente awor no tin balor mas, pasobra no por construi riba nan of no por coba nan tampoco.
E compania Caribbean Beton, cu ta pertenece na un grupo estableci na Venezuela, tabatin e malasuerte di haya prohibicion pa explota e tereno cu nan a cumpra na Sero Cristal pero na otro banda tabatin e suerte di a haya un pida tereno prominente na Barcadera pa por sigui cu nan operacionnan. A opta e ora pa importa material for di Venezuela of otro paisnan, procesa nan na Aruba y bendenan riba mercado local. E reto cu awor nan ta enfrenta ta cu pa procesa santo, piedra y cement den un area habri, ta rekeri un permiso di molester, cu segun informacion, nan no ta dispone di dje ainda.
Di otro fuente nos a compronde cu, aunke e permiso oficial no ta cla ainda, cu for di Ministerio di Infrastructura nan a haya “torzegging” pa por cuminsa opera numa mientras ta keda cla cu e proceduranan interno pa entrega nan e permiso di molester.
For di DTI nos a compronde cu ta un procedura esaki ta, esta cu Departamento Huridico di Gobierno ta manda pidi conseho di varios departamento, relaciona cu peticion pa un permiso di molester. DTI ta un di e departamentonan envolvi, pero tin mas. Ta depende di tur e consehonan aki, cu na final DWJZ lo emiti un conseho final na Minister di Husticia. Con leu e procedura aki ta, no ta conoci ainda, pero a confirma cu un conseho final no a sali direccion di Minister ainda.
Trahadonan den e area ta reclamando cu constantemente nan mester traha bou stof. No sa si por yega na un areglo pa Caribbean Beton traha otro ora, pa evita cu ta stroba e operacion normal riba waf. Asina a nota ayera, riba dia liber, con ta “crush” material riba nan tereno, pero cu atrobe ta causa molester riba waf.
A compronde cu entretanto ASTEC a informa Departamento di Inspeccion Tecnico (DTI) di e molester cu nan ta confrontando ultimamente, pa verifica si e compania aki por a haya un permiso di molester pa esaki. A pidi e entidad di control di Gobierno pa tene cuenta cu e molester aki lo tin consecuencia pa maneho di waf di carga, cu atrobe lo por tin consecuencia con ta maneha cu carga na e sitio. Ta tur e tipo di molesternan asina mes ta causando cu liñanan di barco di carga a anuncia aumento di nan tarifanan for di Merca pa Aruba.
Parce cu tin un lista di companianan local cu a yega di pidi pa haya un tereno na Barcadera cerca di waf di carga, pero nunca a ricibi ni contesta, ni di Gobierno di MEP e tempo aya, ni di AVP y awo tampoco di POR cu ta maneha e cartera di infrastructura. Ta cuestiona cuanto suerte e compania aki si tin, pa cuminsa operacion na Aruba y mesora haya un tereno asina prominente.
