Franklin Maasdamme, un ciudadano biba na Papaya den un declaracion duna, ta haci un denuncia publico contra su sobrino, Alvin Molina un funcionario halto di Cuerpo Policial. Un denuncia cu tin di haber, segun el a splica, cu robo di un cacho dobberman cu e sobrino a regal’e y pa despues bin busk’e bek.
Maasdamme a splica cu tur cos a cuminsa na inicio di januari, despues cu e sobrino Alvin Molina a cont’e cu e ta bay regala e cacho. El a pidi e sobrino pa regal’e y a bay cun’e. Esaki a sosode cu un condicion, esta cu ora e cacho raza, cu ta tefi, e haya un di e puppynan. Y, segun Maasdamme, el a bay di acuerdo cu esaki.
Tur cos a cambia ora cu e tefi a pega y dado momento Molina, e ta bisa, a bini na e cas, a surgi un discusion y e sobrina a coy e cacho bay cun’e.
Despues di e sucedido, el a pidi asistencia di polis, kendenan no a yega su cas pero si a bay topa cu Molina banda di un supermercado na Papaya. El a bay entrega un keho na Warda pero a mand’e na ex Interbank pa haci un denuncia. Pero atrobe, e ta bisa, Polisnan no a haci nada ya cu Fiscal Akkerman a duna ordo pa cera e investigacion, Maasdamme a splica. “Na Aruba no tin husticia. P’esey mi ta haci e denuncia publico aki. Mi kier mi cacho bek. El a regalami e cacho. Cu mi placa di pensioen mi a cria e cacho casi 11 luna largo. Na Aruba no tin husticia, no ta haci nada cu mi denuncia.”
Den e video aki por lesa tur loke cu e ciudadano a conta di su desesperacion y cu el a avisa autoridadnan tambe cu e lo aserca 24ora.com pa haci su denuncia.
