Dialuna mainta tabata tin un reunion cu a tuma luga di sindicato di polis SPA. Segun Omar de Kort, basicamente nan a bay trece e mocion cu el a trece algun siman atras.
Na e momento di e apertura di e reunion, tabata tin miembronan cu a bin cu punto di agenda. A pone su mocion como punto number 5 di agenda. Tabata tin miembro cu no tabata di acuerdo cun’e y tabata kier pa trata e punto di agenda aki number 1.
Esaki no a bay mucho trankil tampoco pasobra tabata tin hopi conmocion na e momento ey. Basicamente despues di basta rato, toch a trata e punto aki. Na final e directiva a tuma e decision y en blok tuma nan retiro, di cual ta pone cu lo mester bin un eleccion nobo.
Kico a pasa
Ultimo biaha de Kort a splica riba e puntonan cu tabata tin. Tabata pa falta di comunicacion di parti di sr. Edgard Maduro, vooral den e parti di tumamento di decision sin cu miembronan ta na altura di dje. Tin algun punto tambe cu tin cu keda interno, segun de Kort.
Comision
Omar de Kort a splica cu tin cu bay reuni cu e miembronan awor aki. A forma un comision chikito cu tin cu stipula e parti di e votacion, esta bin cu un eleccion nobo. Esakinan tin cu traha riba dje awor aki. En principio a stipula un fecha caba, pasobra e directiva mes a walk out di e reunion eynan. E ora, nan como miembro y vooral de Kort cu a bin cu e mocion dilanti, a asumi su responsabilidad como miembro, pa bin cu un fecha di eleccion.
Fecha
Tentativamente nan tabata tin dia 21 di Mei, cual ta 6 siman for di awe, dialuna 9 di April. Pero probablemente lo tin cu cambia e fecha pa algun dia despues, mirando cu no lo bay tin un grupo grandi di polis na Aruba, den cuadro cu Memorial Week den exterior.
Carlos Hodge
Posibilidad cu un pensionado tin pa forma parti di directiva tey. Esey ta normal, segun de Kort. Solamente cu de Kort no por papia den nomber cu sr. Hodge. E no tabata tin comunicacion personalmente ainda tampoco.
Otro miembronan
Riba e pregunta si lo tin algun otro miembro cu lo a postula pa ta e siguiente presidente di e sindicato pa Polis, tin di compronde cu tin algun miembro cu si ta interesa den postula nan mes. Naturalmente sr. Edgard Maduro ta keda cu e opcion pa postula su mes bek y tambe otro miembronan di e sindicato.
Awe mes por a mira cu tabata falta hopi colega y miembro di sindicato durante e reunion. No por bisa cu nan no ta interesa den reunion, pero tin cu tene cuenta cu nan ta miembro y tin e derecho di ta den un reunion asina ey, aunke cu ta trahando si of no. Tin derecho di reuni. Esey hopi miembro no ta na altura di dje, of ta asumi cu no ta na altura di dje.
Leiding
E no tin di haber cu leiding cu no ta permiti reunionnan asina. Den pasado de Kort tabata forma parti di un directiva caba y e ta corta e tempo ey cu ora tin un reunion hopi importante, tur miembro ta bay y leiding ta tuma e districtonan over, segun de Kort.
