Recientemente a tuma luga na John F. Kennedy Education Centre e lansamento oficial di Weganan Escolar den un bachi nobo WE ARUBA. Alabes a cera conoci cu e mascota di e weganan, esta WÉWÉ.
WE ARUBA ta trata di un concepto di ocho scol den diferente sport, futbol, basket y volleyball. Ya caba e weganan di clasificacion a cuminsa.
WE ARUBA lo tuma luga di 17 di juni pa 25 di juni 2022, caminda cu dia 17 di juni lo ta e apertura oficial y colorido di WE ARUBA.
Mas aleu, e minister a indica cu WE ARUBA lo conta cu participacion di hopi mucha y e prioridad ta riba e scolnan basico. Cu e weganan aki kier promove e weganan entre e scolnan. Scol preparatorio lo participa den ‘kids run’ y ‘kids athletics’. Scol basico lo competi den futbol, volleyball, basketball, beach tennis, badminton, dammen y ‘kids run’. Scol avansa ta participa den baile deportivo y baseball.
Ta bay tin uniform nobo pa cada scol, uniformnan hopi bunita.
Tambe a lansa e personahe oficial, den forma di un parha, un prikichi, cu lo carga y propaganda e weganan aki.
Minister di Deporte ta pidi pa promove e weganan escolar, entre tur e scolnan. Ta e prome stap pa forma nos muchanan pa un miho mañan.
Edgard Erasmus, miembro di Management Team di IBISA tambe tabata presente na e lansamento di e Weganan Escolar Aruba 2022. Como IBISA, nan ta hunga un rol importante den e organisacion.
For di januari, nan a cuminsa traha riba esaki hunto cu Ministerio di Deporte, como tambe e otro stakeholdernan, pa mustra e bunitesa pero tambe e importancia pa stimula deporte na un edad jong y tambe na uniform lo ta uno hopi leuk.
IBISA ta contento di forma parti un biaha mas di esaki.
Mario Wester, docente di Scol Basico Washington a indica cu e toch e ta anticipa pa wak e concepto di Wega Escolar 2022 y kico tur esaki ta encera. Por ultimo, Minister di Deporte, Endy Croes a desea tur e scolnan participante hopi exito y a pidi pa pueblo di Aruba en general, pa apoya e muchanan. Ban aporta na logra un di e metanan di WE ARUBA cu ta pa promove deporte bou di nos alumnonan di scol preparatorio, basico y avansa. Ban brinda deporte e oportunidad pa en berdad ta un motor pa crea amistad, forma futuro lidernan pa nos comunidad, fomenta caracteristicanan positivo y crea mucha y hobennan mas sano.
For di Milan, Italia, Denzel Dumfries via un video a desea tur e muchanan hopi exito den e Weganan Escolar 2022, pa nan disfruta di esaki y cu e lo t’ey presente na e apertura oficial di Weganan Escolar 2022.
