Su nomber ta Teodoro Nguema, conoci como un di e presidentenan di mas corupto cu mundo a yega di conoce. Den e relato aki, e conocido presentado Giovanni Trim, a relata storia di e presidente di Guinea Ecuatorial, den oost di Africa. E pais aki a bira un di esunnan mas rico na Africa, ora cu e Mericanonan a descubri petroleo na costa di e pais.
E pueblo a tabata emociona cu e promesa cu porfin costo di bida lo baha y porfin lo tin poder di compra, cabando cu pobresa. Lastimamente cu e deseo aki nunca a yega n’e pueblo.
E presidente, prome cu el a firma contract cu e compania ExxonMobil, no a perde tempo y a posiciona tur su hendenan, esta su famia, su amigonan cercano, na luganan strategico, den varios departamento di su gobierno, pa asina facilita corupcion y transaccion ilegal.
El a haci su yiu homber Teodoro Nguema Jr. vice-presidente di su gabinete y su otro yiu Gabriel, a bira minister di mina y hidrocarbono. Asina ey el a sigui posiciona mas y mas famia den luga importante, pa asina facilita su transaccionnan personal y miyonario.
Na momento cu a cuestiona e presidente, e ta contesta cu e ta un persona cu ta haci cos na manera transparente. Laga e storia aki ta un refleho pa nos aki na Aruba y con ta relat’e na nos situacion actual.
