Cas di Cultura ta presentando su produccion mas nobo inspira riba e Maestro Pintor di e Era di Oro, Rembrandt van Rijn. E obra cu ta un experiencia teatral yama ‘REQUIEM 350 | Ode to Rembrandt’, conmemorando cu na 2019 ta 350 aña pasa cu el a fayece, lagando atras un herencia incalculabel pa mundo henter.
Vicky Arens-Tjon A Tjoe, Director di Cas di Cultura, den un conferencia di prensa a splica cu Rembrandt a nace cu un talento grandi y den su tempo e tabata tin exito caba como pintor di potret di personanan di rangonan halto di sociedad. Sinembargo tambe el a pinta potret di personanan comun di siglo 17. Sin lubida cu el a pinta su mes alrededor di 100 biaha, cu ta dun’e e apodo actual di e prome rey di ‘selfie’.
E obra ta explora,riba un manera contemporaneo y moderno su gran obra ‘De Nachtwacht’, cu ta circula un mito rond di dje. E maestro di luz y scuridad tabata un homber complica, profundo, devoto y cu a stima hopi tambe. Rembrandt no a fayece como persona rico, sinembargo su obranan ta wordo bendi awe pa decenas di miyones di dollar. E ta pone nos refleha riba arte y su balor en general.
Ta yama danki na sostenedornan y coloboradornan di e proyecto esta, Prins Bernhard Cultuurfonds, Departamento di Cultura Aruba, Vertegenwoordiging van Nederland op Aruba, Aruba Airport Authority, Elite Productions y Guardian Group.
Actuacion poderoso, baile dinamico, musica manera di pelicula, canto urbano, efectonan di luz y arte visual, tur ta traha localmente cu colaboracion y creacion firme di e integrantenan di e team cu ta haci ‘REQUIEM 350 | Ode to Rembrandt’ un obra local unico y diferente, cu ta pone nos celebra creacion y arte. Tambe e ta subraya nos posicion den Reino Hulandes, un herencia cu nos tambe ta comparti, asina creando lasonan positivo.
‘REQUIEM 350 | Ode to Rembrandt’ ta bou di direccion artistico di Olga van Bochove. E elenco ta consisti di Beach Lama, Jhon Freddy Montoya, Ephrayim Odor, Tuesday Irwin, Astra Paesch, Tyron Chirino, Djurwin Brito, Dijon Inesia, Marvin Rouse, Roberta Romelli y Leonardo Philips. Adriano Nanof a encarga cu musica y zonidonan special. E teamnan di Cas di Cultura y Elite a traha riba luz, video arte digital y efecto.
Scolnan basico y secundario a confirma 3600 alumno pa presencia e obra y lo tin dos funcion pa publico dianan 14 y 15 di november pa 8pm.
Pa mas informacion tocante tur integrante, e proceso y e obra mes por mira e Facebook page di Cas di Cultura y Instagram casdicultura_aruba.
