Compara cu juni 2019, den e luna di juli 2019, e cantidad di placa den circulacion a baha cu Afl. 55,5 miyon te na Afl. 4.379,8 miyon. Esaki a resulta door di reduccion den e reserva di divisa netto (-Afl. 41,9 miyon) y den e activo domestico netto (-Afl. 13,6 miyon). E reduccion den e activo domestico netto a wordo causa pa e bahada den transaccionnan no relata na credito (-Afl. 28,5 miyon) compara cu e subida den credito domestico (+Afl. 14,9 miyon).
E crecemento den credito domestico a resulta for di un aumento den tanto credito bancario netto na e sector publico (+Afl. 13,0 miyon) y den credito bancario na e sector priva (+Afl. 1,9 miyon).
E subida den credito bancario na e sector priva ta debi na un aumento den credito na empresa (+Afl. 8,2 miyon) y hipoteca pa vivienda (+Afl. 3,7 miyon), cu a wordo mitiga pa un caida den credito na consumidor (-Afl. 10,1 miyon). Tambe, credito bancario netto na e sector publico a expande door di un bahada den depositonan di gobierno (-Afl. 12,9 miyon).
Den e luna aki, e benta netto di divisa na publico (-Afl. 247,3 miyon) tabata mas cu e compra netto di divisa for di publico (+Afl. 205,4 miyon). E benta netto di divisa ta resulta for di e importacion di mercancia, inversion directo, y otro servicionan. Compra netto di divisa ta relaciona principalmente cu entrada genera for di turismo.
Inflacion
E nivel general di prijs, cu ta wordo midi door di e indice di prijs di consumo, a registra un subida di 3,7 porciento den e luna di juli 2019 compara cu juli 2018. E contribuyente principal na e aumento aki tabata e componente “Cuminda y Bebida No-Alcoholico”. Pa loke ta trata e promedio anual di e tasa di inflacion, esaki a registra 4,2 porciento na juli 2019, compara cu 4,3 porciento na juni 2019.
Entrada di Gobierno
Entrada di gobierno a suma Afl. 102,3 miyon na juli 2019, cual ta Afl. 13,2 miyon mas compara cu e mesun luna di e aña anterior. Esaki a resulta for di un subida den entrada di impuesto (+Afl. 15,4 miyon) y un caida den entrada no relata na impuesto (-Afl. 2,2). E expansion den entrada di impuesto a resulta principalmente door di crecemento den impuesto riba benta di negoshi (+Afl. 8,9 miyon; introduccion di B.A.V.P. compara cu e mesun luna den 2018) y impuesto riba divisa (+Afl. 2,4 miyon). Di otro banda, entrada di impuesto riba salario (-Afl. 3,8 miyon) y impuesto riba ganashi (-Afl. 2,1 miyon) ambos a experiencia bahada.
