Durante e conferencia di prensa di AVP e ex Parlamentario di AVP Desiree de Sousa Croes tambe tabata presente pa papia un poco riba e veredicto di un caso cu el a cuminsa contra un decisión di Prome Minister Evelyne Wever Croes cu a cay na su favor.
Den su declaracion e ex parlamentario ta bisa cu henter e actuacion di e mandatario ta indica cu e tabata consciente cu su persona di berdad tin e posicion di Director di Arubahuis. E carta a wordo manda p’e rond di 7’or di mainta riba e prome dia di e Gabinete Wever Croes y el a wordo manda cu un bode di Arubahuis pa e adres cu e tabata kedando na dje na Hulanda. Croes a splica cu el a bay Hulanda, pasobra su ultimo trabou tabata na Arubahuis como Director. Pero e Prome Minister nobo di Pais Aruba tabata di opinion cu e mester a bay bek pa su posicion di docente na scolnan publico.
Loke cu e ta haya straño den henter e situacion aki ta, cu si e ta kere cu e mester bay bek pa su posicion di docente, di con no a laga e Minister encarga, Rudy Lampe, pa atende cu e asunto aki. “Den su afan pa kap cabes cu machete stompi el a mandami un carta cu mi no mester meld como Director di Arubahuis pero cu mi mester bay scol bek mas lihe posibel.”
Hilaridad tabata e situacion despues di e veredicto. Esaki, segun Desiree Croes, pasobra e abogadonan a bisa cu Prome Minister a haci un fout, door di hal’e (esta Croes) di luga siendo cu ta otro Minister mester a manda e carta. Desiree Croes a splica cu Hues a bisa den e veredicto e hecho cu Minister Presidente no tabata bevoegd pa mand’e e carta, no ta kita afo cu e intencion tabata pa laga e ex Parlamentario sa cu el a tuma un decision cu tin un efecto directo riba su posicion como ambtenaar.
El a bisa cu den e afan di Gobierno pa kita hendenan cu a traha hopi duro, pa añanan largo den proyectonan importante pa pais Aruba den departamentonan manera BoBario, Formacion Social y MFA, kendenan tur a wordo manda cas. E Ministernan, el a bisa, den nan afan pa kap cabes, nan ta manda carta robes na adres robes pa personanan robes y den funcionnan cu no ta cuadra. E ta pone cu e hendenan mester bay Corte y Gobierno mester gasta placa di pueblo pa defende nan decisionnan robes. E decisionnan aki ta un forma di dividi e pais aki, “si bo no ta geel, blauw of blanco”. E ta lamenta cu un ruman perdi, Otmar Oduber, ta bezig ta corta cabes di personanan cu pa hopi aña a sostene na momento cu partido MEP, esun cu ta drumi cune awor, tabata persigui’e. Awe e ta tene man cu nan den e lucha contra mama y tatanan cu a traha duro pa hopi aña pa proyectonan di e Gobierno anterior pa Aruba.
E actitud ariba menciona, el a bisa, ta tipifica mente di e Gobierno aki. Nan kier simplemente perhudica esnan cu a sostene partido AVP den e ultimo 8 añanan. Tin un grupo di hende cu a pasa di AVP pa MEP y cu a campaña pa partido geel y cu tampoco a yega trabou, pero e grupo aki si a mantene na trabou. Pues un grupo nombra door di AVP cu a bira MEP si a wordo wanta na trabou.
Enbes di traha riba e diferencia, manera baha edad di pensioen manera priminti, no a traha riba dje ainda; kita belasting riba pensioenadonan, kita Aruparking, peor te dia di awe nada di esaki no a tuma luga ainda.
Contrario na loke sra. Wever Croes a propaganda, cu e ser humano ta central, no ta keda ilustra den su decisionnan. El a perhudica e ciudadanonan di manda e grupo cas pasobra nan tin e color politico robes. El a reta cualkier persona pa señala un caso di un trahado cu a wordo manda cas solamente pasobra e ta MEP. Hasta directornan di MEP a wordo trata cu respet bou Gobiernonan di Gabinete Mike Eman I y II. A mantene e personanan den nan posicionnan, apesar cu e partido berde a wordo critica pa esaki. E ta lo contrario na loke partidonan MEP, POR y RED ta haci awo. “Mi ta spera cu sra. Evelyne Wever Croes pasa man riba su curason pasobra ta hendenan cu a traha pa hopi aña largo pa proyectonan pa Aruba.”
