E parlamentario di PPA Eduard Pieters ta cuestiona e modificacion di mocionnan den sala y e falta di mehoramento den e funcionamento y reglamento di ordo di Parlamento.
Den un declaracion cu a lanta bastante discusion politico, e Parlamentario di fraccion di PPA, Eduard Pieters, a duna su punto di bista riba e reciente acontecimento y e maneranan di traha den Parlamento di Aruba, particularmente rond di e mocion presenta pa e parlamentario Mike de Meza y e actitud di algun colega parlamentario den sala.
Modificacion di e mocion ta casi un Plagiaat
Segun Parlamentario Eduard Pieters, e mocion cu a keda aproba pa e mayoria no ta e mocion original cu e parlamentario Mike de Meza a traha cu hopi dedicacion. Pieters a splica cu de Meza a dedica oranan largo di trabou pa studia y redacta un mocion realistico cu tabata busca pa defende y protege pueblo pa e cambionan no bini di un forma drastico.
Sinembargo, despues cu otro fraccionnan a haci multiple cambio y a modifica e fechanan y e contenido substancial, e mocion a cambia completamente. Pieters a compara e situacion aki cu un acto di plagio: “E ta mescos cu ora bo ta haci un pintura bunita, y un hende ta bin, ta haci un par di ‘crash crash’ riba dje y ta bisa cu e ta di dje. E mocion cu a pasa no ta e mocion di Mike de Meza mas.”
“Ta lamentabel pa mira con ora un persona haci un trabou extenso y profesional, otronan ta coy e trabou aki, hacie cambio y presente como si fuera ta di nan.”
Clarificacion riba votacion di Minimumloon
Parlamentario Pieters a probecha tambe pa aclaria e confusion cu ta existi den pueblo tocante e votacion reciente. El a remarca cu e fraccion no a vota contra e ley di aumento di salario minimo (minimumloon) manera cu algun sector kier haci kere, sino cu e votacion tabata encuanto e mocion y nada di amiendanan rond di e proceso legislativo.
Ademas di esaki, e parlamentario di PPA a expresa su desapunto pa e conducta di algun colega parlamentario cu a mustra alegria o celebracion pa e salida o renuncia di un persona cu a aporta hopi pa su partido y pa e parlamentarismo. “E ta lamentabel pa mira ora hende ta disfruta di e dolor di otro den e ambiente politico,” Pieters a enfatisa.
Urgencia pa reforma e Reglamento di Ordo di Parlamento
Un di e puntonan mas critico cu Eduard Pieters a trece dilanti ta e falta di progreso den e comision encarga cu mehoramento di e funcionamento di Parlamento. El a recorda cu hunto cu Otmar Oduber y otro di su coleganan a instala un comision pa revisa e Reglamento di Ordo (Reglement van Orde), pero te cu awor e comision no ta funcionando debidamente ni ta yama reunion.
Puntonan clave di reforma rekeri pa PPA:
- Claridad den proceduranan di Mocion: Establece reglanan stipula pa ora un mocion wordo modifica substancialmente.
- Reglamento di votacion: Evita interpretacionnan ambiguo durante y despues di votacionnan den sala.
- Funcionamento eficiente: Convoca e reunionnan di comision pa haci e cambionan necesario pa Parlamento funciona cu transparencia.
Pieters a conclui reiterando cu su compromiso den Parlamento ta pa percura cu e leynan y mocionnan ta keda trata cu seriedad y cu e regla y procedimentonan ta keda cla pa e pueblo di Aruba wordo representa debidamente.
