Awe mainta famia di Felix “Riri” a haya un yamada pa bin wak nan tata, cu ta riba piso, cu no ta habri su wowonan mas. Dokternan ta duda cu e lo por vence Covid-19 cu famianan ta kere cu el a contagia cu ne den hospital.
Famia ta den un desesperacion, pasobra for di momento cu a interna e tata diahuebs ultimo, no a pone den Cuido Intensivo, apesar di su situacion delicado. Famia ta pidi dokternan y a pidi ayudo tur rond cerca personanan cu por tin influencia pa pone nan tata den ICU. Pero sin resultado. Awe a yama nan pa bin mira Riri pasobra ta duda cu e lo scapa.
Famia no ta compronde, semper a cuida nan tata y nan mes pa evita contagio cu Coronavirus. Sinembargo mester a intern’e pa nuebe (9) dia debi na un herida na su pia. Siman pasa dialuna el a sali di hospital y su siguiente dia caba el a cuminsa sinti curpa malo cu dolor di cabes y keintura. A logra intern’e y a pone riba piso di pashentnan di Coronavirus, mientras cu anteriormente e tabata interna na piso 4.
Debi cu e tabata den isolacion, a papia cu nan tata via di video-call y cu e tin problema cu hala rosea. Dokter Kock mes a bisa cu e tata ta basta fuerte, mientras cu un dia despues e situacion a empeora te cu a papia cu famia completo riba e situacion. “Awe mainta un zuster a yama y informa cu e tata lo no “make it” pasobra e tin Covid-19, e tin pulmonia y e tin dos tipo di bacteria.” Esaki a cay manera un baño di awa friu, segun e yiu muhe, Norrene Dabian, kende no por compronde di con nan ta bisa cu no ta necesario intern’e den ICU. “Si mi tata tin pulmonia y Covid-19, bo ta lague muri pasobra e ta bieu? Pasobra e tin edad, 85 aña. Si e tabata bo mama of tata lo lague asina. Ta duelmi cu ta mi tata tin cu pasa den esaki,” el a bisa.
Felix “Riri” Dabian, ta viudo, tata di 9 yiu, entre nan di e bon conoci Stanley Dabian di Departamento di Cultura. Hopi forsa na famia den e lucha pa nan tata haya e ayudo medico mescos cu lo duna un mucha hoben.
