Grupo San Hudas Tadeo Dakota ta invita tur devoto pa asisti sin falta na e Nobena na honor di San Hudas Tadeo – Santo y Abogado di Asuntonan di Desesperacion – cual lo cuminsa diasabra 19 di october pa 6 or y 15 p.m y asina ta sigui tur dia. Cu excepcion di diadomingonan 20 y 27 di october riba cual dia e nobena lo cuminsa pa 5 or y 15.
E nobena lo termina diadomingo 27 di october. Durante e nobena lo reza oracionnan y Rosario na San Hudas Tadeo.
Pues tur deboto na San Hudas Tadeo, y Pueblo di Aruba en general ta keda cordialmente invita pa asisti sin falta na e nobena, ya cu Hesus mes ta bisa unda cu tin dos of mas reuni den Su nomber, ey E lo ta memey di nan y, nan intencionnan, oracionnan lo wordo seguramente scucha.
Fiesta di San Hudas Tadeo lo wordo celebra dialuna 28 di october cu un Santo Sacrificio di Misa pa 7’or di anochi. Prome cu e Santo Sacrificio lo resa un Rosario na honor di Mama Maria como cu ta luna di october.
Kier a recorda e pueblo di Aruba cu Santonan ta wordo venera y no adora. Y aki nos ta desea di reitera for di Palabra di Dios for di buki di Revelacion: Revelacion 5, 8: “Ora e Lamchi a tuma e rol, e cuatro sernan y e 24 ancianonan a cay abao Su dilanti; cada un tabatatin un harpa den su man y scalchinan di oro yen di sencia cu ta hole dushi; esey ta oracionnan di santonan di Dios”. Comentario riba esaki ta cu “Aunke e santonan ta den shelo, nan ta resa incansablemente. E oracionnan aki ta alaba Dios, pero tambe ta rasonabel pa asumi cu santonan ta intercede pa nan rumannan na tera, specialmente ora nos ta pidi nan yudansa”. Pero no lubida cu Señor Hesus ta esun central di nos bida y kende nos mester adora, glorifica y dun’E tur honor y gloria, ya cu E ta esun cu ta atende y scucha San Hudas Tadeo su intercesion pa cada un di nos ricibi loke nos ta pidi, pasobra e Palabra di Dios mes ta bisa: “Pidi lo bo haya, busca lo bo encontra, bati y porta lo habri pa boso”, basta cu e ta pa cada un di nos su santificacion.
Nobena di San Hudas Tadeo ya ta cumpli en total 57 aña na Parokia di Dakota, e prome 35 añanan bao direccion di defunto Tula Pablo y for di 1997 e nobena a sigi bao direccion di debotonan di San Hudas Tadeo.
