“Ta un solo medida a keda den e mundo di entretenimiento y net cu esey e musiconan no ta cumpliendo”, asina un fuente den e Crisisteam a adelanta nos riba e reunion extraordinario yama awe merdia pa 3:00 pm na Bureau Rampenbestrijding Aruba (BRA) na Wayaca. Y mirando cu e cantidad di casonan activo ta subiendo desproporcionalmente y a surpasa 300 caso activo di Coronavirus, ta evidente cu pronto lo bin cambio den maneho atrobe.
“No mag tin fiesta publico”, esey ta e punto di salida di crisisteam, den unda tin expertonan riba tur tereno, incluyendo salud publico y polis. A aclaria cu e establecimiento por tin entretenimento pa cliente, manera normal. Locual ta prohibi ta pa organisa fiesta den cual ta cobra apart pa entrada. “Esey ta prohibi”, segun un fuente den crisisteam.
Awe merdia lo atende e punto aki cu e musiconan miembro di Aruba Entertainment, encabesa pa Ofo Escudero. Lo splica e cantante cu si Aruba Entertainment sigui riba e racha cu su miembronan no ta cumpli, cu por spera cambio di maneho pronto. Semanalmente ta nota barnan, clubnan y tin biaha hasta restaurant ta organisa fiesta di cual tin banda presentando cu normalmente no ta toca eyden y ta cobra pa entrada. E ora no por papia mas di entretenimiento pa e clientenan, sino mas bien a organisa un fiesta bailabel, cu ta prohibi ainda.
Mayoria biaha e fiestanan aki no ta ni di e club of bar, sino di promotornan priva cu ta organisa un fiesta, ta keda cu placa di entrada mientras e club ta keda cu e bar. Crisisteam tin henter un otro bista riba e asunto aki y ta prefera pa clubnan cu normalmente tin un banda presentando eyden clmp entretenimiento gratis pa e clientenan, lo ppr sigui presenta. Pero tira un fiesta bailabel extra awo ta zona casi manera un evento tipo concierto caba, locual awo no ta posibel.
