E ultimo dianan aki tin hopi discusion riba e presupuesto 2018, cu no ta cla ainda. Departamento di Finansa ta premira un deficit di 195 miyon florin. Esey a causa bastante conmocion entre e partidonan cu ta purbando pa forma e siguiente coalicion. Sinembargo, ta obvio cu e proceso di traha un presupuesto no ta mucho bon conoci cerca e partidonan, pasobra ta evidente cu no por traha un presupuesto si no tin Gobierno. Un presupuesto ta refleha maneho di Gobierno pero traduci den placa. Si no sa e maneho y cambionan cu e Gobierno nobo lo haci, ta imposibel papia di un presupuesto y/of deficit caba 

Tur aña Directie Financiën ta concipia un presupuesto pa e aña binidero a base di datonan cu nan ta dispone di dje. Directie Financiën ta sinta cu cada Minister pa incorpora e gastonan di e maneho cu cada un di e Ministernan ta premira den e aña binidero. Despues cu logra saca e prome resultado, Directie Financiën ta cuminsa evalua unda tur por haci adaptacion den cada presupuesto di e diferente Ministerionan te ora yega na un saldo deficit cu mester cumpli cun’e a base di e ley di LAft.

 
Pa esunnan cu no ta compronde, hecho ta cu e proceso aki ta masha intensivo y ta tuma pa varios siman y ta wordo ehecuta pa e empleadonan di Departamento di Finanzas hunto cu coordinadonan di cada Minister bou di mi supervision di Minister di Finanzas.

 
Ta pesey, e comentarionan cu awor ta scuchando riba e presupuesto di otro aña no ta cuadra pasobra ainda no sa e maneho ni tampoco e cambionan. Por ehempel, si tuma na cuenta e comentarionan tocante reduccion di cantidad di Minister di parti e partidonan cu ta bay forma e Gobierno nobo, anto ya eynan lo baha e presupuesto di otro aña. Tambe a scucha nan referi na re alocacion di diferente departamento. Cu e dos ideanan aki riba mesa, ta imposibel pa concipia un presupuesto na e momento aki.

 

Alabes, NO ta conoci kico lo ta e maneho y e gastonan di e Gobierno nobo cu lo mester sinta den e siguiente simannan. Recientemente a indica entre otro, cu lo baha edad di pensioen (AOV), a papia di subi pago di pensioen (AOV), a papia di corta gastonan di personal, a bisa di lo emplea mas Polis, mas Duanero, mas maestro di scol, etc. Tur e gastonan aki lo mester bin ainda den e presupuesto pa otro aña.

 
Ta pesey, for di esunnan cerca di trahamento di presupuesto di e ultimo añanan, a splica cu NO por calcula e consecuencianan financiero pa e presupuesto di 2018 sin sa e maneho pa aña 2018. Ta precisamente na momento cu partidonan tin un acuerdo di Gobernacion, cu nan lo por traduci esaki den e presupuesto pa e añanan binidero!

Comments

comments