Durante tratamento di e caso IBIS denCorte, na dado momento Fiscal di Ministerio Publico y abogado mr. Chris Lejueza “clash” cu otro. Na mas cu un ocasion, e abogado Defensor a splica e Magistrado cu gran parti di e investigacion ta haci riba un pia robes, debi na e falta di conocemento di nos cultura y nos idioma. Locual e Hulandesnan ta interpreta robes, tin consecuencia awe pa ciudadanonan inocente cu ta exponi riba mesa di sacrificio pa haya castigo.
Pero, e Fiscal no a keda man crusa ni cu boca keto tampoco. El a defende su mes dilanti Hues bisando cu no ta asina cu idioma por ta e problema debi cu na Landsrecherche tur e Polisnan ta Arubiano y ta domina Papiamento den forma perfecto. Mas ainda, den e cuerpo investigativo di RST, e ta parti entre mita Arubiano y mita ta Hulandes. Pues bisando esey e Fiscal no ta haya cu por culpa tur cos riba e falta di conocemento y bon dominio di nos idioma nacional y afinidad na e cultura local.
Na dado momento e Fiscal a puntra e abogado: “Pero Bo no ta kere cu ta momento awor pa cambia e cultura di Aruba?”E pregunta aki a bini relaciona cu e splicacion y hustificacion di abogado mr.Chris Lejuez relaciona cu custumber pa sponsor partidonan politico of politiconan durante e proceso electoral riba nos isla of di tin contacto of di ta cerca di un mandatario. Riba esey abogado Chris Lejuez a reacciona bisando “Si, mi ta di acuerdo cu den cierto casonan, tin espacio pa cambia nos cultura, pero…..no riba lomba di Arubianonan inocente!”
