Tabata Minister di Turismo, Salubridad Publico y Deporte, Dangui Oduber, cu a habri dialuna mainta cu e anuncio riba su pagina di Facebook cu lo bin un Cinema na San Nicolas. E mandatario a haci esey mencionando cu e inversion lo ta di sector pribva pero cu e ta un bon noticia pa habri siman cune, specialmente pa e clima di inversion pa pariba di brug. E pueblo di San Nicolas a acepta e proyecto aki cu brasanan habri.
For di momento cu a anuncia e proyecto, mesora a cuminsa felicita MetaCorp y famia De Veer pa nan sosten continuo na economia di Aruba y specialmente awor pa San Nicolas. No tabata mucho luna pasa cu a anuncia construccion di un cinema masha moderno mes, un di esunnan mas moderno den Caribe, cu tecnologia iMax pa nos isla. E proyecto, cu varios sala grandi y moderno, incluyendo VIP, lo bini riba Sasakiweg cerca di Hospital.
Na mes momento a anuncia renobacion di e 6 salanan existente den Renaissance Marketplace. Ey a cambia e stoelnan, haci nan mas comodo, habri e espacio pa cana den e sala di cual pianan por rek mas y por brinda miho servicio. Di otro banda a introduci e concepto VIP na Aruba den cual ta sinta riba stoelnan comodo “recliner” y cu opcion pa ricibi servicio personalisa cu un menu adapta, te na bo stoel. Mesora e concepto nobo aki a conta cu un acogida grandi bou clientenan di The Cinema.
Te ainda MetaCorp mes no a anuncia nada ainda relaciona cu e proyecto pero a compronde di fuentenan den e compania cu lo uza e edificio existente patras di caya principal, unda antes tabata Teatro Principal na San Nicolas. Ey lo renoba henter e edificio y traha no menos di 3 sala moderno di cine specialmente pa e mercado pariba di brug. E siman aki ainda lo por spera e anuncio oficial di e proyecto grandi aki, cu lo bin man den man cu un inversion miyonario den nos economia, specialmente pa San Nicolas.
