Door di no acepta e condicionnan impone door di Gobierno di Hulanda pa un fiansa sin interes pa Gobierno di Aruba, a pone cu awe no a firma ningun acuerdo y consecuentemente Hulanda lo no traspasa algo mas cu 200 miyon florin pa Aruba. Esey ta un suma necesario pa por paga FASE, Subsidio di Salario y otro gastonan di operacion di Gobierno. Minister Presidente mr. Evelyn Wever-Croes a sigura di lo keda na mesa algun dia mas, durante reces, pa toch purba yega na otro pa Hulanda por los fondonan pa nos isla.
Actualmente ta papiando di un suma di 204 miyon florin, cu ta necesario pa yuda nos pais pa e lunanan juli, augustus y september. “Aruba a cumpli cu tur condicion pa por bini na remarca pa esaki. Aruba a baha salario di empleadonan publico desde mei, Minister y Parlamentarionan a baha salario cu 25% y a corta den gastonan mensual di AZV”, asina e prome mandatario a bisa nos awe den un entrevista pafo di Binnenhof na Den Haag, Hulanda.
“Berdad ta cu dialuna nan a pone dos condicion nobo pa Aruba. Dos grandi, e otronan ta menos mal, cos cu nos por biba cu ne. E dos condicionnan nobo cu a pone pa Aruba a pone cu nos mester a studia nan y delibera riba nan. E dos condicionnan ey nos no por acepta”, di acuerdo cu Minister Presidente Wever-Croes. El a splica cu ambos ta leynan di Reino, Rijkswetten”, nan mester ta leynan di Reino di consenso y esey no a tuma luga.
Gobierno di Aruba a splica e Ministernan Hulandes den Conseho di Minister di Reino awe cu prome cu Covid-19 nos isla tabata bayendo bon financieramente, claro cu un debe grandi, pero esey nos mester purba bah’e. Prome cu Covid nos tabata cumpli cu e normanan, a tuma decisionnan dificil na Aruba pa sanea e situacion financiero.
Loading…
Reload document 
Open in new tab “Covid a dal henter mundo y a dal Aruba tambe y a dal Aruba hopi duro. Desde e tempo ey nos ta presta placa di Hulanda. Nos a haya dos tranche caba di 200 y pico miyon. Awor aki nos ta pidiendo pa tres luna mas atrobe 200 y pico miyon. Mi ta kere pa e tres ultimo lunanan di aña nos lo no ta cla pa para riba nos propio pianan ainda, tambe nos lo pidi un 100 y pico miyon atrobe, dus nos ta papiando di mas cu 500 miyon florin. Kiermen mi ta compronde tambe cu Hulanda kier bin cu e exigencianan, esta pa tin supervision riba e placa”, di acuerdo cu Minister Presidente mr. Evelyn Wever-Croes.
E Prome Minister di Aruba a sigui splica cu prome cu Covid nan no tabata presta nos placa, nos a presta placa di nan. Awor despues di Covid nos ta fiando casi mey biyon florin. “Cu nan kier un poco supervision eynan ta logico. Cualkier banco cu Bo bay lo ponebo mas condicion. Kiermen mi ta compronde, pero nos mester papia di dje y awo nos a haya e oportunidad di por sigui papia riba dje”, asina Minister Presidente Wever-Croes a splica awe na Den Haag.
Loading…
“Mi mester bisa cu na final di Rijksministerraad e decision ta cu no ta duna placa, pasobra ningun di e tres paisnan a bay di acuerdo cu e tranche aki y e ora mi a trece padilanti cu si Premier Rutte tuma un decision asina, bo no ta reconoce e dolor cu e pueblo Arubano ta sufriendo”, asina e prome mandatario di Aruba a bisa esun Hulandes. Consecuentemente, despues di esey, Minister Presidente Rutte a apodera Secretario di Estado Knops pa durante reces (cu ta dura te september), pa purba yega na otro ainda. Premier Wever a reuni mesora su tras cu Secretario di Estado Knops y Minister di Finansa di Hulanda, Hoekstra, y a yega na palabracion con den e siguiente dianan pa sigui sinta cu otro pa yega na consenso con e entidad mester ta hinca den otro y con e supervision mester ta hinca den otro, pa e ora ey pasa e fondonan pa Aruba.
“Awo mi no a keda cla ainda cu e aprobacion pa Aruba haya su fondo, pero si mi a haya suficiente indicacion con nos mes lo por sigui padilanti y cu den e siguiente dianan lo tin claridad riba esey y cu Aruba lo por yega na e di tres tranche aki hopi lihe”, asina Minister Presidente mr. Evelyn Wever-Croes a termina bisando.
