Diasabra merdia, pa mas of menos 12’or y 10, a surgi un problema entre un trahador di DOW y chauffeur di un Nissan March. Personal di DOW tabata poniendo asfalt riba caminda na Ponton, ora cu chauffeur di e Nissan March a haya ta bon di pasa cerca di e truck di DOW, a dal e porta, rancando e spiel di e Nissan March. Dado momento e pasahero di e March a cuminsa insulta e trahado di DOW.
Polis a presenta na e sitio y a intermedia, splicando e dama den e March cu e mester ta mas responsabel riba caminda y e mester respeta trabao di DOW. Awo, pa motibo di un descuido e Nissan March a keda sin spiel.
Diasabra merdia, pa mas of menos 12’or y 10, a sosode un accidente cual tin cu bisa cu ta pa motibo di negligencia. Aparentemente un Nissan March coriendo den e zijweg banda di Flortique na Tanki Flip, a haya señal pa e por a pasa na man drechi di un truck di DOW, cu na e momento ey tabata poniendo asfalt riba caminda. Cual tin cu bisa cu no tabata cumpli cu reglanan di trafico, por ehempel no tabata tin ningun borchi di indicacion cu tin un trabao andando, no tabata tin pilon, net nada.
Mientras cu e March tabata pasando banda di e truck, un otro trahado cu tabata tin e porta di pasahero habri y teni, cobando den jug di awa, a laga e porta bay, consecuentemente kibrando e spiel di e March y tambe raspando e auto.
Den ningun momento a yama polis pa intermedia. Ta un patruya di Playa cu tabata riba e ruta aki a para y a check si tur cos tabata bao di control. Chauffeur di e March a splica kico a pasa, caminda cu e polis a confirma cu en berdad no por ta asina cu por yega y traha sin ningun tipo di indicacion den trafico, treciendo esaki na peliger, refiriendo asina na e trahadonan di DOW.
Pero pa sorpresa di e chauffeur di e March, e agentenan a subi nan patruya y a sigui nan caminda. E chauffeur di e March, claramente disgusta a keda warda riba roadservice di su seguro, pa asina e duna su declaracion.
