Nigel Maduro, e hoben tras di e protesta ‘No Mas Hotel’ a mira e proces-verbaal cu ta birando popular e ultimo dianan aki, un dia prome cu su tomzitting, tocante su caso cual awo nan ta yama ‘Caso Turtuga.’
Den esaki ta para preto riba blanco cu ministerio di Husticia a duna opdracht pa haci Maduro su caso un prioridad manera nos a bin ta publica ultimo dianan. “Mi a haya esaki straño pasobra pa kico net mi caso? Anto pa kico nan mag di haci esey? Mete cu casonan di recherche?,” Maduro ta expresa.
E hoben ta sigui na bisa cu nan a haya hopi straño cu nan a manda un mensahe di Whatsapp pa recherche pa pone presion y buta su caso como prioridad. “Mi a hay’e hopi straño, e no ta klop pa kico haci net mi caso prioridad mientrastanto tin otro casonan na Aruba cu mester mas prioridad.”E hoben ta referi na casonan di corupcion, pedofilia, abuso di hende muhe y problemanan social – dus ta haya hopi straño cu nan ta purba di haci un ehempel di dje segun Maduro.
E hoben ta bisa cu e no ta intimida pa esaki pasobra e berdad ta sali den dia cla na final di dia. “Mi kier pa mas hoben para contra e cosnan aki pasobra e ta pasa den dia cla, y nan mes ta duna nan mesun declaracion cu nan no a duna opdracht y no tabata sa di proces-verbaal mientrastanto mi ta kere ta un tiki straño, hopi straño, algo no ta klop eynan.”
Maduro ta bisa cu e ta luchando pa nos tur – e ta luchando pa naturalesa y nos tur mester di naturalesa. E hoben ta bisa cu nos bishitantenan, nos turistanan cu ta bini aki tambe ta bini pa disfruta di e naturalesa, nos tur ta biba di naturalesa y nos economia ta basicamente draai rond esaki.
“Mi ta purba na conserva y crea tiki conscientisacion tocante esaki, y tambe mi ta defendiendo nos herencia cultural cu tambe kier kita cu demasiado construccion, demasiado desaroyo cu tur hotel y condos aki.” Maduro ta bisa cu na final di dia nos tur ta keda afecta di e cosnan aki y e ta bay yega na un punto cu nos tur tin cu cuminsa lanta para pa loke ta di nos, “anto esey ta Aruba, Aruba ta di nos,” e ta expresa.
