Nelson Oduber: “Bosman, stop di haci redashi y shisheria y cuminsa cana pa Ministerio Publico”

1842

Mi no sa reacciona ariba locual parlamentarionan Hulandes ta bisa di nos politiconan, pero elemento manera Bosman a cuminsa abusa.

E mesun persona cu a bisa di investiga e Citgo deal y awe 5 aña despues ni fu ni fa! Segun Bosman su fuentenan ta “Arubianonan” aki mes cu ta mand’e tur sorto di redashi, calumnia y cu ningun di nan no tin problema pa kita nos autonomia!

Ta ken a coopera pa para e scol na Noord?
Segun Bosman, Hulanda no por fia nos placa, pasobra politiconan ta hinca e placa den nan saco y ta horta e placa sin bisa a base di cual evidencia, prueba y dicon e no a bay Ministerio Publico. Desde 2001 gobierno di AVP a firma cu Hulanda pa “bouw af” ayudo pa desaroyo.

Boso a bin cu un FDA, unda boso y nos ta pone placa y ta boso al final ta dicidi kico ta pasa. Mescos tempo cu nos a laga cla y aproba un HAVO/VWO pa Noord y becindario pa 23 miyon florin y boso a coopera pa stop construccion di e scol y hinca e placa den e locuranan di rails, tram cu parkeermeters. Hopi “bon” prioridad!

Falta di respet pa inspectornan di belasting
Bosman a bisa cu politiconan lo ta fix belasting sin bisa den cual caso y cual prueba e tin. Ami a traha cu yen di director y inspector di belasting y sa cu tur a haci nan trabou debidamente cu un par di excepcion di casonan cu a ser denuncia, tin pa mi mes y tambe pa otronan. Aki tur empleado publico, tur cu ta cobra di gobierno pa cualkier contrato of e NV-nan nan loonbelasting y tur otro cos ta ser kita tur fin di luna. Den comercio e mester ta mescos, pero tin casonan a sali na cla awor cu tin hopi cu no ta cumpli. Bo no por generalisa cu ta politiconan ta “fix” belasting faltando respet pa nos inspectornan. Si bo tin prueba ken a fix ken bisa kende nan anto! Bo a bisa cu politica aki ta friends and family. Cuanto ministro, secretario di estado y parlamentario boso a “fix” nan den tur clase di posicion? Check rond di boso cada un!

Stop di haci redashi y shisheria
Segun Bosman, autonomia no ta ora cu kier baha un ministro, pasobra e lo a denuncia corupcion di coleganan. Ki dia abo a mira un evidencia of prueba of ta “cuentas de hadas?”. “Cu ami a tende cu e di cu un tal Don nadie lo a bis’e etc”. Wel Bosman aki si bo tin evidencia of prueba nos Ministerio Publico por tarda, pero e ta ser persigui. Un cos si Ministerio Publico no kier ser usa pa ningun politico. Si e ministro cu a duna bo e cosnan tin e pruebanan, bis’e duna bo nan y cuminsa cana y stop di haci redashi y shisheria. Awor Bosman, conta mi con bin casi tur Ministro di Finansas Hulandes a traha pa Shell y dicon y pakico nunca Shell a paga Winstbelasting? Dicon den 2e kamer ora oposicion a denuncia e bagamunderia aki diripiente a stop tur discusion?

Ban fortifica tur nos institutonan
Autonomia ta un instrumento legal politico cu ta regla den e Statuut y nos constitucion, unda art. 3 di Statuut tin na un forma limitativo cual ta tur e podernan di Reino y cual ta nos autonomia. Art. 29 hasta ta dicta cu nos no por fia den exterior sin boso aprobacion. Tambe art. 36 ta bisa cu e paisnan den Reino lo yuda otro ora mester. Aki na Aruba nos a yega hasta na un surplus di 46 miyon florin na 2020, pero ta e Covid 19 a mata nos financieramente. E argumentonan politico di boso segun art. 38 di Statuut por yega na otro. Boso kier mas control, no ta problema. Ban fortifica tur nos institutonan y nos democracia. Pone 3 Officier van Justitie na Ministerio Publico pa investiga tur bo redashi y calumnianan, pero corda bin cu evidencia y pruebanan si! Investiga tambe tur e Hulandesnan cu a bin aki banda y “cumpra” yen di propiedad y lanta yen di negoshi manera ta Lotto miyonario di Hulanda nan tur a “gana”.

Boso a bisa cu boso ta bay skop nos di Statuut. Un ta problema. Pasa bisa Merca cu ta dicidi pa boso cu Aruba ta ser saca for di Reino Hulandes! Basta abusa di nos hendenan sin base alguno. Cu tin politico cu ta cay pa cos y cu ta “gevoelig voor giften”, esey ta tur caminda y no aki so! Stop di generalisa.