Pa basta tempo caba na Aruba tin hopi coredo perhudica pa motibo di hacimento di negoshi na Bushiri Karting / Eagle Karting. Coredornan profesional di Aruba mester bay afo pa competi y train mientras cu den pasado hopi careda cu profesional di Aruba y di exterior tabata competi riba e pista di Aruba.

Desde cu a bin problema unda a cuminsa haci otro tipo di negoshi cu e pista destina pa Karting, e coredornan local a keda perhudica. Esnan cu yega na e pista ta mira solamente quadracers, busnan di tour y tambe UTV pa offroad. Ta huur Kart pero esey no ta pa competencia pero pa gana placa.

Esaki ta un parti chikito di locual ta sosode riba e pista cu mester destina pa e deporte mes di Karting. E historia di e pista ta largo. Ta un pista destina pa haci deporte pero ultimo dos aña principalmente a bira full comercial. Pa colmo esnan cu ta ganando hopi placa cu e actividadnan comercial no ta cumpliendo cu e impuestonan di e tereno destina pa deporte. A kita e libertad for di e coredornan local pa haci negoshi sin cumpli cu e obligacionnan social. Gobierno mester drenta tambe den maneho di Bushiri Karting mescos a haci cu Palo Marga y asina duna e coredornan e pista bek cu un maneho destina pa deporte di Karting.

No por ta asina cu un grupo ta haci negoshi y gana placa cu full otro cos cu no tin di haber cu Destinacion di e pista. Ora coredornan kier bay pista mester tene cuenta cu e negoshi andando cu ta pasa riba e deporte di Karting cu e pista ta destina pe. Manehadornan a pone un orario di 3or pa 6or di atardi pa usa e pista contra pago tambe. Antes e tabata 7or di mainta pa 7or di anochi. Despues el a bira di 7or di mainta pa 10or di anochi pasobra a haya luz pa core anochi. Awor a corte di 3or di atardi pa 6or di atardi. A lubida riba mayornan cu ta traha y muchanan cu ta bay scol y no por core entre 3or cu 6or. Cu otro palabra ta perhudica e deporte 100%. Hopi a cumpra ekipo y containernan cu tabata poni riba pista y mester lanta esaki bay cune nan cas. Hopi placa na ekipo warda pornada pasobra un grupo cu ta maneha e pista ta impedi e deportista y ta escohe pa haci negoshi strobando of perhudicando e coredo.

Ta spera cu gobierno atende e asunto cu tur seriedad mescos Palo Marga y finalmente yega na un solucion pa no perhudica e deportista local. Karting ta cohiendo un popularidad hopi grandi internacionalmente. Aruba ta sacando cara constant competiendo den exterior pero no por train manere debe sera na Aruba pasobra e pista ta den man di esnan cu ta haci negoshi sin pensa riba e deporte. Na Colombia mes e pista ta habri di mainta te atardi pa practica e deporte. Asina e mester ta na Aruba tambe. E negoshi di rental di Kart na Colombia ta full apart di e competencia. E ta full otro pista. E pista pa Karting mester keda pa e deporte 100%. Ainda coredornan local cu stima e deporte ta carga e speransa cu nan por logra haya e pista bek pa nan por sigui train y lanta e deporte bek.

Comments

comments