Sindicato STA a reacciona riba e peticion treci dilanti pa SEPPA y a indica cu esaki ta algo descabeya. Pero esun cu a propone structura salarial ta sindicato STA tempo cu nan tabata representa e trahadonan di Arubus.
Magaly Brito, Secretario general di SEPPA, a splica cu Sindicato di Trahadornan Arubano (STA) tabata e sindicato anterior y a atende e asunto di salario dje trahadonan. SEPPA a mira e reaccion di STA bisando cu e proposicion ta uno descabeya. E sindicalista ta lamenta e reaccion aki, pasobra e proposicion di SEPPA ta proposicion di e trahadonan. E mesun trahadonan cu un tempo tabata su miembro y a aporta tambe na sindicato STA.
Na 2019 STA a propone pa bin mediante di un protocol un structura salarial nobo. E echo cu e trahadonan aki no a sigui cu e lucha p’un structura salarial nobo cu ne of su sindicato, e no ta duna Diego de Cuba e echo pa bagatelisa of trata di kibra e lucha dje trahadonan. Esey ta loke SEPPA ta lamenta.
E proposicion di e trahadonan cu SEPPA tin na mesa, ta basa riba un perdida di costo di compra dje trahadonan. Esaki ta desde 2016 te awo. Di 2016 STA a laga esaki atras y no a lucha p’e, pero awo e trahadonan tin cu sigui. Pasobra na final ta toca nan cartera, nan tin e lucha aki y no ta pa SEPPA ni ningun otro hende cu ta e trahadonan, cu awo de Cuba mes kier critica of bagatelisa.
Ta un lastima, pasobra normalmente no ta haya tipo di reaccion di sindicato. Brito a sigui indica cu no ta espera esey di ningun sindicalista y reaccion dje trahadonan ta di profesional y lamenta. Na final ta e trahadonan ta husga su accionnan.
