Den parlamento a hiba luga tratamento di e plan di impuesto 2023 y na mes momento a trata cuater mocion durante esaki. Den un entrevista cu parlamentario di partido MAS, Aquannette Gunn a haya un recapitulacion di locual cu a tuma luga diaranson den parlamento.
E prome mocion cu a presente no a dispone/conta cu sosten di mayoria como cu coalicion, den su totalidad a vota contra y oposicion a vota pro. E mocion aki ta relaciona cu e grupo vulnerabel cu ta dependiente y ta ricibi un onderstand, caminda a pidi pa cada cabes di famia un suma di 300 florin adicional tur luna.
Na banda di esaki, e mocion ta trata tambe un compensacion adicional na persona cu un of otro limitacion (un of otro handicap), ademas un aumento di e ‘schoolkindertoeslag’ di 200 florin. Un peticion a bay tambe na gobierno, pa implementa e iniciativa di parlamentario Eman y Wyatt –Ras di fraccion AVP, pa nos muchanan bou di diesseis aña cu un of otro limitacion tambe keda inclui y por bin na remarca pa haya un compensacion.
Siguientemente a pasa pa di dos mocion cu ta di partido RAIZ/MEP, e no a conta cu aprobacion di fraccion di partido MAS como cu practicamente a urgi pa laga gobierno haci un investigacion, via un tercera parte/ compania imparcial, revisa e necesidad di reparticion riba impuesto di turista entre pais Aruba, ata y TPEF. Motibo di esaki ta pa haci un estudio /investigacion y determina e suma minimo necesario pa ATA sg, meta pa mira optimalisacion den operacion di ATA segun e proposito cu el a keda institui.
Parlamentario Aguannette Gunn a duna di conoce cu tin motibo cardinal pakico nan no por a sostene dicho mocion y tin di haber cu na momento cu trece dilanti e palabranan ‘minimo necesario’ ,ta trata di nada mas cu un forma hopi sutil, galante, elegante pa limita (capa) e suma di mercadeo asigna pa ATA. Suma cu nan ta dispone di dje pa haci mercadeo pa pais Aruba.
Ta teme cu si limita esaki, den e sector turistico cu ta e pilar mas importante di nos pais, den un mercado dificil caba y cu tur gasto den aumento, lo haci esaki mas dificil pa por sigui sondea y diversifica cu fondo limita. No obstante cu no a sostene e mocion aki, el a pasa den staten cu e voto di e 11 parlamentarionan cu ta sostene e gobierno.
E di tres mocion cu tambe ta di RAIZ/MEP, caminda ta haci peticion na gobierno pa trece alivio pa e adulto mayor, revision di e ‘ouderenaftrek’ y bin cu un extra ouderenaftrek, mantene e ouderenaftrek cu a kita anteriormente na e suma di 3500 florin y tambe sondea posibilidad di aumenta e suma maximo di entrada impuro te cu 65 mil florin. Di sumo importancia no solamente pa esunnan cu ta ricibi un solo pensioen pero tambe esunnan di APFA, brindando espacio na e adulto mayor.
E ultimo mocion di MEP/RAIZ caminda ta pidi instrui CBS pa haci na prome luga un recalibracion y revision di e bestraansminimun basa riba e ultimo informacion, como tambe emiti un publicacion mas actualisa riba e bestaansminimu.
Importante pa por specifica y duna un porcentahe/cifra berdadero di cuanto ta dispone di e suma ey pa por sobrevivi na Aruba. Gunn a menciona tambe cu e topico aki a bira un tema di discusion, cu e no ta un suma absoluto, como ta trata di un constelacion di famia di mas di mas hende ta biba y cu ta comparti gasto. Un informacion mas veridico y concreto e ta crucial pa dispone di esaki. Tabata motibo tambe cu a sostene e mocion aki den parlamento.
