E hendenan na Venezuela ta desespera pa bandona e pais y esnan cu tin boto, ta probecha di e situacion unda cu no solamente ta cobra den dollars, pero ta tuma tur otro cos di balor a cambio.
Apesar di tur control na ambos pais, e ta keda un negoshi atractivo y lucrativo e transporte di hendenan.
Recientemente autoridadnan na Venezuela a bin ta siguiendo un grupo cu ta dedica nan mes na trafico di hende. E ta un banda cu bon conexion den area di Punto Fijo. Despues di un seguimento, a detene cinco persona den un Toyota Yaris, cu tabata haci maniobra pa transporta persona. Den e vehiculo a confisca cuater celular y un tablet, dispositivonan uza pa negosha den trafico di hende, di manera ilegal pa Aruba y Corsou, a cambio di divisa, prendanan di balor of vehiculo.
E cinco individuonan aki a wordo pasa pa Ministerio Publico.
Hustamente diabierna ultimo tabatin un caso trata den Corte di dos Venezuela, Capitan y su asistente, kendenan a baha dies hende na costa pariba di Aruba, Santana di Cacho. Tur cos a bay bon ora cu a baha e “10 clientenan” cu nan vest y tur. Pero cogiendo rumbo pa Venezuela, apesar cu nan no tabatin iluminacion abordo, Kustwacht a señala e boto y a duna nan ordo pa para. Inicialmente no a haci esaki, pasobra nan a pensa cu ta piratanan. Pero cu los tiro di advertencia, nan a dicidi di paga motor.
Tanto e capitan como su ayudante a declara cu cada un di e personanan a paga shen y pico dollar pa por biaha pa Aruba. Y e capitan y su ayudante lo a haya 200 dollar cada uno pa haci e trabou aki. E resto di placa ta bay pa esun cu a organisa e boto.
Pues apesar di tur e peligro, e tipo di biahenan aki ta keda un demanda, di esnan cu kier yega un di e islanan Hulandes en busca di un miho porvenir. Nan ta lanta abruptamente di e soño aki ora cu nan wordo gara.
