Maart ta luna di cultura y dia 21 di maart a celebra Dia Internacional di Poesia.
Richard Tromp, Manager na Museo Cas TanTin, hunto cu Fundacion Mi Cutisa a organisa un anochi di poesia. Recientemente tabatin Poeta di Patria y a pensa pa continua cu esaki den luna di maart, door di invita e poetanan cu a sali na prome y di dos luga. Pero tambe a invita dies poeta cu no ta competi, pa deleita e publico pa nan scucha y cera conoci cu Arte di Palabra.
No tabata un anochi di competencia, pero tabata un anochi mas relaha, unda tur hende por a bin declama nan poesia. A stimula nan pa haci dos of tres poesia cortico, pa asina e publico por cera conoci cu mas obranan di Arte di Palabra.
A cera e anochi cu Fifi Rademaker, cu ta un poeta di Corsou, hopi conoci. Na aña 2022, el a gana e premio Cola Debrot.
Tromp a sigui bisa cu tin diferente poesia, cu ta rima, limrick, poesianan cu ta mas largo, di protesta. E anochi a conta tambe cu tres persona, di cual un di nan tabata Maroushka Tromp, representante di UNESCO Aruba, cu ta splica e balor di poesia como un arte di expresion. Un docente di Papiamento a splica con pa crea un poesia cu ta rima. Aunke cu Papiamento ta un idioma chikito, e tin hopi palabra cu ta ‘bloemrijk’, cu ta crea poesia cu ta mas cerca di bo.
Unesco ta sostente e iniciativa aki, como cu e ta un ehecucion di e dia. UNESCO tabata encarga pa duna un splicacion di e dia, pon’e den contexto local.
Tabata un anochi bunita, caminda por a wak e arte literario, poesia di pasado y con e ta biba awo. TIn hopi cos cu por conta, analisis y investigacion. Un generacion nobo ta sigui cu e genero aki pa uz’e como instrumento di innovacion, pa pensa riba su posicion den e mundo cu transformando digitalmente.
Ta importante pa para keto na e fundeshi cu tin y pa engrandece y hacie duradero. Esey ta loke UNESCO Aruba ta boga p’e. E iniciativa di Anochi di Poesia por bira un plataforma cu por sigui crece. Pa refleha riba su importancia den comunidad.