Riba nan Facebook dr. Horacio Oduber Hospital a duna un informacion pa publico pa desmenti rumornan cu tin persona interna cu coronavirus.
Nan ta bisa cu informacion corecto ta esencial y un bes mas Dr. Horacio E. Oduber Hospital ta desea di informa cu te awe, esta diabierna,13 di maart, no a constata ningun caso di coronavirus na Hospital. Si a haci test cu pashent cu a yega Hospital cu sintoma corespondiente, pero tur test te cu awe a sali negativo.
Protocol HOH
Hospital su team di expertonan a sigui traha duro riba mehora e protocolnan a base di e desaroyonan mundial rond di e coronavirus, a sigui duna informacion y training na tur miembro di personal pa asina atende cu esaki den caso un pashent yega HOH cu coronavirus.
Bishitantenan
“Cu e salud di nos pashentnan na prome luga Hospital desde awe ta bay ta mas estricto pa cu e regla ya existente di mantene un maximo di 2 bishitante na mes momento pa pashentnan interna. Por fabor mantene un bon higiena di man haciendo uzo di nos hand sanitizers situa na diferente luganan strategico. Alabes si bo bishita un pashent interna purba mantene un distancia di mas o menos 1 meter cual tambe ta yuda minimalisa e riesgo di contagio. Ta pidi cooperacion mirando cu nos kier minimalisa e riesgonan pa nos pashentnan cu ta malo y interna.”
Sintomanan
Si en caso bo tin un di e sintomanan di coronavirus, esta keintura riba 38 grado, tos seco y falta di rosea por fabor tuma contacto cu e callcenter institui pa Gobierno di Aruba na telefon 2800101. Pa plamamento di e virus no acudi na Huisartsenpost (dokter na warda) y solamente acudi Departamento di Emergencia si en caso bo tin sintomanan severo.
Por fabor tene bon na cuenta e gruponan di riesgo esta personanan 80 aña of mas y tambe hende cu ta sufri di un of mas malesa y pues tin un sistema immuun abou.
HOH ta sigui pidi tur hende pa mantene un bon higiena di man, keda calmo y sigui di cerca e pagina di Facebook di Hospital cu lo mantene tur hende bon informa tocante lo ultimo den cuadro di coronavirus.
