Despues di diescuater aña, Musico á Musico ta bek na Aruba. Esaki ta un colaboracion cu e Iglesianan Cristian di Aruba y Iglesia Good Samaritan Cristian Church (GSCC).
Pastoor Frank Daal, di Iglesia GSCC, a cuminsa na bisa cu Departamento di Cultura di Aruba, pa medio di Jhon Freddy Tobon Montoya, tambe a duna su colaboracion n’e evento aki. Lo tin bintidos diferente artista-, musiconan profesional cristian, cu ta bin for di tur part’i mundo, p’.e Zuid- y Centro America, Merca y hasta for di Europa.
Nan ta bin cu e meta y vision, pa train y inspira e studiantenan cu lo participa. E nivel di e studiante no ta importa. Kisas e studiante ta aspira pa ta un musico den iglesia, cu kier adora Señor, pero no sa con, pastoor Daal a bisa cu esaki ta e conferencia cu ta recomendabel. Meta ta pa uza e arte, e talento pa cu e diferente artenan cu Dios a pone den un persona, pa dirigie pa cu Dios. Musico á Musico ta yuda descubri e talento di un persona, ta yuda train e persona den e talento. Pero mas cu tur, ta yuda e persona cu e curason tras di e talento aki. Y mas cu claro, ta uz’e pa adora Señor.
Lo bay tin tres dia intenso di tayer. Ta papia di baho, guitara electrico y acustico, ta papia tambe di zonido. Por tin e miho banda, pero si no tin un bon zonido, e no tin su efecto. E biaha aki lo tin tambe ‘Digital Audio Workstation’, cu ta algo nobo den e iglesianan y cu ta den uzo caba. Kisas tin hende cu ta uz’e of cu kier siña con pa traha cu ne. Tambe lo duna tayer di Basic Photography, Videography y Social Media, canto, danza y teatro. Lo ta tres dia largo di tayer intenso.
PROGRAMA
Diaranson, dia 27 di maart, lo tin e gran apertura. Pero for di 6:00pm caba, e portanan di Iglesia GSCC ta habri pa e studiantenan bin registra, paga y haya nan banchi. Pa 7:30pm lo tin e apertura, cual ta consisti di informacion cu lo duna, pero tambe un tempo di adoracion na Dios. E siman aki, pa e comunidad cristian, ta uno hopi importante, unda cu ta recorda e crucificacion di Cristo Hesus y tambe su resureccion for di morto. Un siman di gran importancia y ta celebr’e cu e tayernan aki.
E apertura ta adoracion na Dios, caminda ta celebra e morto y resureccion, nos bida den Cristo y ta duna comienso na e gran conferencia aki. Dia 28 di maart pa 30 di maart, lo tin e tayernan durante di dia. Mucha di 10 aña bay ariba por cuminsa registra pa participa. Ta trata di tayernan cu ta cuminsa for di 8:30am te cu atardi, 5:00pm. Esakinan ta tayernan hopi intenso. Costo pa e tayer aki ta di 100 dollar, cu ta e mesun prijs di 14 aña pasa, sigur un prijs hopi economico pa tur loke e studiante lo ricibi.
Tur anochi, for di diaranson padilanti, for di 8:00pm, lo tin anochinan di encuentro di celebracion y adoracion na Dios. E parti ey ta completamente gratis, tur hende por bin. E weekend binidero lo probecha tambe pa evangelisa, di e trabou cu Cristo a haci pa nos, rib’e cruz di Calvario.
Diadomingo dia 31 di maart, riba Pasco di Resureccion, lo tin anochi di oracion nacional, riba Plaza Padu, manera tur aña. Pero tambe lo bay tin un tempo di hubilo, unda cu lo alaba y adora Señor. Un dia pa recorda cu El a lanta for di morto, E ta bibo, El a resucita cual ta di gran celebracion.
P’e dia aki, e studiantenan a haya preparacion y inspiracion y tur e iglesianan e dia aki lo bini hunto riba Plaza Padu e dia ey, hunto cu henter e ekipo di Musico a Musico. Aki lo lanta un ofrenda di alabansa y adoracion dilanti di e trono di Dios, den un forma di unidad tremendo.
Pastoor Frank Daal ta extende un invitacion n’e pueblo di Aruba pa bin riba Plaza Padu pa un anochi di alabansa y adoracion, pa un tempo special di celebracion di loke Cristo a haci pa nos. Tambe p’e tempo importante aki pa e conferencia di Musico á Musico.
Riba e anochi aki grandi aki tambe, riba Plaza Padu tur e studiantenan cu a completa e tayernan lo ricibi nan certificado.
Tur informacion por haya tambe riba e pagina di Facebook di GSCC – Good Samaritan Christian Center y tambe riba e pagina di Facebook di ICA (Iglesianan Cristian di Aruba).
Wayne Hilton, Director y Fundado di Musico á Musico, a cuminsa bisa di ta contento di ta bek na Aruba, despues di 14 aña. El a conta cu Musico á Musico, ta un grupo di hende cu ta bin hunto pa duna bek n’e hendenan cu mester siña mas tocante musica, pero particularmente musica di misa, nan ta cristian, cu ta stima Dios. Nan kier tin un impacto pa iglesia y tambe un impacto pa riba e bida di cada individuo.
Hilton a sigui bisa cu tur arte ta bin di Dios. Arte no ta solamente saca potret, pero tambe musica. Arte ta cada instrumento y cada bos, cu por canalisa den un solo direccion. “Nos ta kere firmemente cu den iglesia tur alabansa y ofrenda mester ta dirigi na Dios, enfoca riba djE y e grandeza di un solo Dios cu nos conoce cu a bira personal, ora cu El a manda Su unico yiu na mundo pa nos por ta salba.”
Ademas di tur esaki, un grupo di musico ta bin hunto e siman aki. E tayer aki nan a dun’e caba 14 aña pasa y ta spera di hacie mucho mas miho e biaha aki.
Tambe nan lo duna testimonio di con bida di hopi persona a cambia, na momento cu nan a acepta Dios den nan bida, pa medio di musica.
Musica ta un bendicion unico pa Dios Su pueblo y mundo henter. Musica ta forma parti integral di nos bida. Nan kier enfatisa esaki, tur dia y den tur manera posibel.
Cristian Duré, Director nobo di Musico a Musico, ta un musico certifica y a extende un invitacion n’e pueblo di Aruba pa e tayer importante aki. nan ta trece e miho musiconan di mundo pa duna les na Aruba. Ta musiconan di taya internacional.
El a enfatisa cu nan ta un grupo cristian na un nivel avansa. Tur hende ta bonbini, no ta importa si e persona interesa ta cristian of no.
