Dialuna anochi tabata tin otro anochi di ensayo pa Musical Time, preparando pa e gran fiesta di e fin di siman binidero, hunto cu ERA di Corsou.
Leo Rodriguez, Manager di Musical Time a cuminsa na bisa cu nan ta polis un cu otro, hincando e setnan den otro y nan ta den ful swing cu e ultimo preparacionnan. El a sigui bisa cu for di Carnaval 65 nan ta bezig, cu tocanan regular. E fiestanan di e fin di siman aki, ta un di e fiestanan grandi cu Musical Time ta preparando p’e. Esaki ta un combinacion cu no ta bay haya facil mas.
Marriott Resort & Stellaris Casino a acerca Musical Time pa un fiesta bailabel hunto cu e agrupacion ERA directamente for di nos isla ruman, Corsou. Nan lo bin cu tur e hitnan di Musical Time, for di nan comienso te cu awo. Tur esaki den e ‘time-frame’ stipula pa nan. Musical Time tambe ta preparando pa nan 45 aña di existencia.
Musical Time semper tabata in un harmonia cu ne y pa e fiesta aki, segun Rodriguez, un 80% di e integrantenan original di e banda lo ta presente den e fiesta di diasabra awo, hunto cu ERA.
Por ultimo, Leo Rodriguez a extende un invitacion na tur e bailadonan pa bin gosa di un bon y dushi fiesta diasabra awo den Ballroom di Marriott Resort.
