Tabata diamars anochi, despues di 10:00 pm, algun bisiña atento a ripara un auto den parking lot di Weng Kee Bar and Restaurant. Na prome instante a kere cu un pareha lo tabata sinta combersa cu otro.
Pero ora nan a tende manera sla ta cay y nan a wak un mucha homber hopi jong ta sinta yora, nan a cuminsa preocupa. Dado momento a wak e mucha homber ta lora eybou sclamando di dolor.
A core yama polis, pero net un rato prome cu polis a yega, e mucha homber a subi bek den auto cu e persona femenino cu tabata maltrat’e y a coy direccion noord.
Ora e patruya a yega na sitio, e testigonan a splica e agentenan kico a pasa y cu nan a subi un auto Chevrolet Optra, y a mustra nan e direccion cu e auto a bay.
Mesora e polis a bay nan tras, a core te Sero Pita, lora bay direccion Ayo pa despues bay bek Santa Cruz sin por a encontra cu e auto.
Mientrastanto e testigonan cu a keda atras, a keda full preocupa y a dicidi di subi auto y tambe a cuminsa core e mesun direccion, pero net prome cu yega Flatstone Ball Park, a lora bay na man drechi y a encontra e auto para memey caminda y e mucha homber na banda para riba kruk.
A resulta cu nan tabata pareha den pasado, pero pa un of otro motibo e dama ta sigui haci e bida di e mucha homber imposibel y tabata maltrate.
Polis a bolbe wordo yama, pero e dama no a keda warda riba Polis y a sali bay cu su auto.
Ora patruya a yega na e sitio a papia cu e stiefvader y a bin compronde cu e mucha muhe ta mas bien un persona toxico, y cu no ta prome biaha cu e sa maltrata e mucha homber. Debi cu e mucha homber ta recien opera na pia, Polis a conseha pa e bay hospital pa check up, ya cu si e a haya sla na pia tambe, por causa cu e pia ta coy infeccion.
Polis a tuma tur dato di e caso y a splica nan e caminda pa cana.
