Loke cu a hala atencion di nos den un noticia publica na Merca ta cu un señora deteni den un investigacion grandi di robo, aparentemente ta procedente di Aruba, unda cu el a lanta. Ta trata di Shaira Clarissa.
E informe ta bisa cu tres empleado di “EZ Pawn” y “Apple Operation” na Manchester ta enfrentando cargonan pa nan supuesto rol den un operacion di crimen por detal. E relato ta bisa cu Polisnan di Manchester y Concord a cuminsa cu e investigacion algun luna atras caba.
Investigadonan ta bisa cu a horta miles di dollar den mercancia for di “big box stores” y djey bende esaki cu e doño di e “pawn shop” (cas di empeño) Shaira Clarissa (38) y su empleadonan Christopher Hill (31) y Kyle Perkins (27). Pa e motibo aki tur tres ta deteni bou cargonan di ta opera un negoshi di benta di mercancianan procedente di robo.
Polis a bisa cu e sospechosonan tabata sa cu e productonan ta procedente di robo y tabata bende nan online pa saca ganashi. Segun datonan preliminar, nan a saca ganashi di mas cu un miyon dollar.
“E ta un crimen inusual y fastioso tambe, pasobra ta trata aki di hendenan cu ta core drenta den tiendanan y ranca mercancia for di otronan, cu ta paga cu placa cu nan a traha duro pa haya, y djei saca ganashi di nan banda,” vocero di polis di Manchester Heather Hamel, a bisa.
Diaranson siman pasa, recherchenan a lista e tienda na Manchester, unda cu na di dos piso a topa cu mas cu 400 caha cera, di productonan horta. Tambe nan a rista un cas y na EZ Apple Repair na Concord.
“E ta un cadena grandi, hopi cos di cas. Tabatin aparatonan electronico, herment, keds, etc. Cosnan nobo of den bon estado for di cual nan por saca mas tanto placa posibel.”
E ladronnan mes cu tabata bende e productonan cu e tiendanan empeño ta uza e placa pa cumpra droga.
E mucha muhe aki cu ta yama su mes “Dutch Caribbean Queen” ta bisa di a nace na Boneiro di mama Arubiano y tata Curasoleño, y a pasa gran parti di su bida na Aruba. Segun informacion cu nos a ricibi tambe ta cu el a conoce su pareha aki na Aruba mes, durante cu e homber tabata cu vakantie. Pa reforsa nan relacion, el a dicidi di bay biba na Merca. Hunto nan a lanta e cas di empeño.
