Dialuna 16 y diamars 17, ta dumando luga e prome Always Girls’ Soccer Camp, cual ta un iniciativa pa encurasha mucha muhenan na Aruba di 6 pa 16 aña pa purba un deporte nobo of perfecciona nan tecnicanan di futbol, cual ta tumando luga na Centro Deportivo Franklin Bareño di 8’or di mainta pa 12’or di merdia.
E iniciativa aki ta parti di e programa di Always yama #LIKEAGIRL, cu ta motiva mucha muhernan pa sinti comodo cu nan mes y e hecho cu como hende muher bo por logra cualkier meta cu bo pone bo dilanti cu pasion, determinacion y esfuerso.
Hobencitanan ta disfruta masha hopi mes di e camp aki. Un di e hobencitanan, di 10 aña, militando den e team di Estrella, a comenta cu nan ta pasa pret, aunke cu e ta hunga cu hendenan mas grandi cun’e, e ta keda mesun cos p’e. E ta conseha pa djis coy un bala, scop’e y tambe wak videonan riba Youtube pa nan sa un tiki mas di e deporte.
David Abdul, kende ta coordinador di e camp aki, a comenta cu por wak cu e ta uno exitoso. No a spera asina tanto mucha muhe cu a bin participa na e campamento aki. E ta algo grandi. E temporada di mundial ta andando y por mira cu esaki por ta a lanta interes di mucha muhenan tambe. Tin varios mucha muhe cu no ta den un team, cu a bin pa prome biaha pa wak si nan gusta e sport. Ta algo bon pasobra por stimula e muchanan pa haci e deporte di futbol. Hopi hende ta kere cu futbol ta pa mucha homber so, pero no ta asina. Por mira mundial di mucha muhe tambe. Always kier stimula esey tambe cu tur deporte cu hende homber por haci, mucha muhe tambe por haci’e.
Tin varios tecnica ta wordo aplica den e camp aki. Abdul a splica cu tin diferente training cu nan ta haya. Nan ta tumando tur aspecto di futbol y pa siña e muchanan. E ta e base. No ta haciendo nada cu ta hopi dificil, pasobra ta haciendo e basic cu e muchanan. Si bo haci algo moeilijk di biaha, nan tin chens di bisa cu e deporte no ta p’e. Si haci algo cu nan ta wak cu nan tin placer den dje, asina por stimula nan tambe pa sigui despues den e camp, por ta pa afilia na un team, pa sigui haci e deporte di futbol.
E camp aki ta uno completamente sold out. Na final di e camp tur mucha lo ricibi nan certificado. Tur a haya nan uniform di Always.
Ana Maria Ramirez, representante di Compra y brandmanager di Always, a comenta cu nan ta sumamente contento cu e kick off di e camp, cual ta exclusivamente pa e muchanan di 6 pa 16 aña, unda cu nan por purba un deporte nobo. Den temporada di mundial por a mira hopi interes y tambe cerca esnan cu ta den mundo di futbol, unda cu nan por perfecciona nan tecnica di futbol. Pa e iniciativa aki, a team up cu ASA (Aruba Soccer Academy), unda cu tabata tin mas di 10 coach certifica riba veld, hunto cu 89 mucha muhe local, pa asina stimula nan pa keda den deporte. Esaki ta e iniciativa di #likeagirl di Always, cual ta promove deporte cerca mucha muhe. Always tin un marca cu un relacion hopi bunita cu un hende muhe, cuminsa den e temporada di nan pubertad, cual por ta un temporada hopi stressfull. Investigacionnan ta mustra cu manera cu mucha muhenan drenta den e temporada aki, ta laga deporte. Ta encurasha purba deporte nobo, pa keda practica deporte y asina tambe biba loke ta e beneficionan di deporte. Ta trata aki di muchanan cu ta practica deporte, ta haci miho na scol, aparte di e beneficio fisiconan.
Ramirez ta splica cu nan ta contento cu e acogida.
E hobennan cu a participa a paga 25 florin di inscripcion. Dia 17 nan lo haya un certificado di participacion.
