Muchanan por fia co’i hunga awo na Hunga Teca

Hunga Teca ta manera un biblioteca, pero unda cu e muchanan por fia co’i hunga y weganan educativo. Gobernador di Aruba, Alfonso Boekhoudt a efectua e apertura oficial na YMCA na San Nicolas, hunto cu e mucha Sean Franklin Croes, nieto di Yamila Hoevertsz.

Stichting Hunga Teca ta hopi gradicido cu a ricibi aporte di muchanan di scol cu a regala nan co’i hunga nan, segun Yamila Hoevertsz-Kock, presidente di e fundacion. E ta sigui menciona cu tur e co’i hunga y weganan, ta loke nan a ricibi di muchanan di scol, di mayornan, di tur esnan cu tabata kier a aporta.

Tambe ta gradicido pa e hecho cu tin hopi boluntario y a haya bastante sponsor. Un fundacion cu mester un espacio pa huur, no por sin sponsor.

Directiva di Stichting Hunga Teca ta consisti di Yamila Hoevertsz-Kock como Presidente, RoseMarie de Vries-Shuffler como Tesorero y Cheryll Lim-Apo como Secretario.

Ademas a adopta un scol, cu ta e Scol Basico Santa Filomena. E idea ta cu e aña aki ta bay haci un sorto di Kooyman Pay It Forward Proyect caminda cu ta bay haci e scol bunita, percura pa material. E aña siguiente, e scol, hunto cu e Fundacion, ta percura pa un otro scol ta haya sponsor. Asina aki un scol ta yuda otro.

Na e Fundacion, e muchanan di 0 pa 12 aña ta bon bini, basta cu nan ta compaña pa un adulto, riba dialuna y diaranson for di 9’or di mainta pa 7’or di anochi y diabierna, for di 12’or di merdia pa 7’or di anochi.

Na San Nicolas nan ta na YMCA. E base ta keda eynan, segun Hoevertz-Kock. Ta bay traha riba un Hunga Teca Bus, cu co’i hunga. E ora por cubri full ariba mes.

Segun gobernador, esaki ta algo necesario. E ta mustra cu tin un balor grandi pa e muchanan. Gobernador a expresa cu e ta hopi contento cu Hunga Teca.

Tambe nan tin un website cu ta www.hungateca.com. Riba e website nan tin nan number di cuenta di banco na Aruba Bank. Tur tiki ta yuda. A cuminsa for di nada, cu ningun cen. E soño awo a realisa. Hoevertsz-Kock ta sigur cu nan ta asina bendiciona cu Hunga Teca Bus tambe lo bin.